CM Shinde in Nagpur : फडणवीसांच्या जोडीने मुख्यमंत्री संघ मुख्यालयात; संजय राऊतांनी दिला सल्ला

मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी आज नागपुरातल्या संघ मुख्यालयाला भेट दिली. त्यावरुन आता शिवसेना खासदार संजय राऊत यांनी त्यांना सल्ला दिला आहे.

नागपुरात सध्या राज्याचं हिवाळी अधिवेशन सुरू आहे. या अधिवेशनाचा उद्या समारोप होणार आहे. त्यापूर्वी आज सकाळी शिंदे आणि फडणवीसांनी राष्ट्रीय स्वयंसेवक संघाच्या मुख्यालयातल्या स्मृती मंदिर परिसराला भेट दिली.

यावेळी त्यांनी आद्य सरसंघचालक डॉ. हेडगेवार आणि गोळवलकर यांच्या समाधीचे दर्शन घेतले. त्यानंतर तिथून पुढे हे दोघे दीक्षाभूमी इथं गेले. तर शिवसेना खासदार संजय राऊत यांनी यावरुनच एकनाथ शिंदेंना टोमणा मारला आहे.

हेही वाचा - क्रेडिट कार्ड वापरताय...मग या गोष्टी माहिती हव्याच....

संजय राऊत आपल्या ट्विटमध्ये म्हणतात, "रेशीमबागेत जाऊन आलात आनंद आहे! या वास्तू सोबत लाखो स्वयंसेवक वर्षानुवर्षे एकनिष्ठ आहेत. त्यांनी कधीही संघ किंवा मुख्यालय हडप करण्याचा नीच प्रयत्न केला नाही. राष्ट्रीय स्वयंसेवक संघाकडून संघटनेप्रती निष्ठा काय असते हे ही शिकून घेतले असते तर अजून बरे वाटले असते."