Ambadas Danve : बँक खाते मोदींनी स्वतःच्या पैशाने उघडले का? अंबादास दानवेंचा सवाल

मुंबई - पंतप्रधान मोदींनी ६० टक्के लोकांचे बँकेत खातं उघडलं, ते काय पंतप्रधान नरेंद्र मोदींनी स्वत:च्या पैशाने उघडले का, असा प्रश्न विधान परिषदेचे विरोधी पक्षनेते अंबादास दानवे यांनी केला आहे. मुंबईत गणेशोत्सवाचा देखावा पाहिल्यानंतर दानवे बोलत होते.

दानवे म्हणाले की, खाते उघडले म्हणजे काय मोदींनी स्वतःच्या पैशाने उघडले का? जनधन खात्याची स्थिती काय आहे, हा पैसा कोन वापरतो, उलट 15 लाख खात्यात टाकणार होते त्याचे काय झाले? असा प्रश्नही दानवे यांनी उपस्थित केला.

शिंदे गटाबाबत बोलताना दानवे म्हणाले की, रात्री अपरात्री बैठका घेणारे हे गद्दार लोक आहेत, त्यांच्याविषयी काय बोलणार, पण गणराज आहे. ते सोंड बरोबर फिरवेल आणि गद्दारांना धडा शिकवेल.

गणपतीच्या देखाव्याबाबत, दानवे म्हणाले की, पर्यावरणाच्या रक्षणासाठी असे देखावे साकारणे गरजेचे आहे. नवी मुंबईतील पर्यावरण हा मोठा प्रश्न आहे. नवी मुंबईतील अनेक डोंगर लोकांनी खोदले, त्यामुळे पर्यावरणाचा समतोल बिघडला आहे. पर्यावरण हे जपण्याची गरज असल्याचंही दानवे यांनी नमूद केलं.