सोलापूर : न्यूरोफिजिशियन डॉ. शिरीष वळसंगकर यांच्या आत्महत्या प्रकरणात अटकेत असलेल्या मनीषा मुसळे माने यांची पाच दिवसांची पोलिस कोठडी संपली. त्यानंतर न्यायालयाने मनीषा यांच्या पोलिस कोठडीचे अधिकार राखून ठेवत १४ दिवसांची न्यायालयीन कोठडी दिली. आता आठ दिवस संपले तरीदेखील पोलिसांनी मनीषाला चौकशीसाठी पोलिस कोठडीत घेतलेले नाही.
गुन्ह्याच्या अनुषंगाने मनीषा मुसळे माने यांनी १८ एप्रिल रोजी रुग्णालयात फाडलेल्या ई-मेलच्या मूळ प्रतीचे तुकडे पोलिसांना त्याठिकाणी मिळालेले नाहीत. त्यानंतर मनीषा मुसळे माने यांच्या घराची झडती घेतली, त्याठिकाणी देखील पोलिसांना काही सापडले नाही. पोलिस कोठडीत मनीषाकडे सखोल चौकशी केली, पण तिने तपासाला सहकार्य केले नाही, असे पोलिसांचे म्हणणे आहे.
सद्य:स्थितीत मनीषाकडे अधिक तपास करून काहीही निष्पन्न होणार नाही, असे पोलिसांनी सांगून पोलिस कोठडीचे अधिकार राखून ठेवत १४ दिवसांची न्यायालयीन कोठडी देण्यास मान्यता दिली. आर्थिक पुरावे उपलब्ध झाल्यावर मनीषाची पुन्हा पोलिस कोठडी घेतली जाईल, असेही पोलिसांनी न्यायालयास सांगितले होते. पण, आठ दिवस झाले तरीदेखील पोलिसांनी मनीषाला कोठडीत घेतलेले नाही. १४ दिवसानंतर पोलिस पुन्हा मनीषा यांची कोठडी वाढवून घेण्याच्या तयारीत असल्याचे सूत्रांनी सांगितले.
पोलिस म्हणतात, ‘ई-मेल’मुळे डॉक्टर होते व्यथित
२००८ पासून मनीषा मुसळे माने या डॉ. वळसंगकर यांच्या रुग्णालयात काम करत होत्या. त्यांनी स्वत:च्या ई-मेल आयडीवरून डॉ. शिरीष यांच्यासह त्यांची पत्नी डॉ. उमा व मुलगा डॉ. अश्विन यांना ‘आपणाकडून होत असलेल्या त्रासाच्या बाबतीत’ असा विषय टाकून ई-मेल केला होता. त्यात अधिकार कापले, पगार कमी केल्याने दोन्ही मुलांना मारून रुग्णालयात येऊन पेटवून घेणार आणि त्याला माझ्याबद्दल चुकीचे व खोटे पसरविलेले स्टाफमधील लोक आणि सर्व वळसंगकर कुटुंबीय सर्वस्वी जबाबदार राहाल, असा ई-मेल पाठविला होता. तिच्या या खोट्या आरोपामुळे डॉ. शिरीष व्यथित झाले होते, असे पोलिसांचे म्हणणे आहे.
वरिष्ठ म्हणतात, तपास अधिकाऱ्यांना विचारा;
तपास अधिकारी म्हणतात, सखोल तपास सुरू
डॉ. शिरीष वळसंगकरांच्या आत्महत्येचा गुन्हा हायप्रोफाईल असल्याचे पोलिसांनी न्यायालयात सांगितले होते. त्यामुळे गुन्ह्याच्या तपासासंदर्भात वरिष्ठ अधिकाऱ्यांना माहिती विचारल्यावर ते तपास अधिकाऱ्यांकडे बोट दाखवत आहेत. तपास अधिकाऱ्यांना विचारले असता, पहिल्या दिवसापासून आजपर्यंत ते ‘सखोल तपास सुरू आहे’ एवढेच सांगत आहेत.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.