Chhagan Bhujbal : कंत्राटी पदभरतीतही आरक्षण द्या - छगन भुजबळ

नागपूर : कंत्राटी तत्त्वावर पदभरती होत आहे. या कंत्राटी पदभरतीतही आरक्षण द्या, अशी मागणी राष्ट्रवादी काँग्रेसचे नेते छगन भुजबळ यांनी केली. राष्ट्रवादी काँग्रेसच्या ओबीसी सेलच्या वतीने दोन दिवसीय शिबिराचे आयोजन महात्मा फुले सभागृहात करण्यात आले. याच्या समारोप कार्यक्रमाप्रसंगी ते बोलत होते.

यावेळी व्यासपीठावर माजी मंत्री प्रफुल्ल पटेल, माजी मंत्री अनिल देशमुख, हरी नरके उपस्थित होते. भुजबळ यांनी ओबीसींच्या जनगणनेवरून भाजपला लक्ष्य केले. ते म्हणाले, की ओबीसींची जनगणना झाली पाहिजे. जुन्या सरकारच्या काळात ते झाले.

परंतु, या मोदी सरकारने ते आकडे जाहीर केले नाही. ओबीसींचा इम्पिरिकल डेटा फडणवीस सरकारच्या काळात एसीत बसून तयार करण्यात आला. त्यांच्या मते मुंबईत ओबीसीच नाही. एससी, एसटीप्रमाणेच ओबीसीला निधी मिळाला पाहिजे. ओबीसींची जनगणना झाली पाहिजे. ओडिशातील दुर्घटनेबद्दल रेल्वेमंत्र्यांनी राजीनामा द्यावा, असेही ते म्हणाले.

मोदींना पलटी मारली ः हरी नरके

पंतप्रधान नरेंद्र मोदी आधी ओबीसी जनगणनेच्या बाजूने होते. त्यांनी ठरावावर सही केली होती. मात्र आता त्यांनी पलटी मारली. ओबीसीच्या विकासासाठी जनगणना आवश्यक आहे, हे नियोजन आयोगानेसुद्धा सांगितले आहे. भाजपकडे ३१ टक्के ओबीसी मते आहेत आणि ते फक्त त्याचा वापर करतात, असे हरी नरके म्हणाले.

ओबीसींसाठी शिवसेना सोडली

त्याकाळात शिवसेना सोडणे सोपे नव्हते. कारण तिथे आत जाण्याचा दरवाजा होता, बाहेर येण्याचा नाही. पण मी याच नागपुरातून शिवसेना सोडली. मी शिवसेना ओबीसीसाठी सोडली, असा खुलासा भुजबळ यांनी यावेळी केला.