सोलापूर : जिल्ह्यातील अकराशे गावांमध्ये बचत गटांचे जाळे असून २४ हजार बचत गटांशी तब्बल अडीच लाख महिला जोडल्या गेल्या आहेत. बचतीची रक्कम व कर्जाची वेळेत परतफेड, यामुळे यंदा १२ हजार ८०० गटांना ३२० कोटींचे कर्जवाटप केले जाणार आहे. वार्षिक १२ टक्के व्याजदराने महिला बचतगटांना कर्ज दिले जाणार असून आतापर्यंत बचतगटांकडे एक रुपयांचीही थकबाकी नाही, हे विशेष.
महाराष्ट्र राज्य ग्रामीण जीवनोन्नती अभियानाचे जिल्हा अभियान व्यवस्थापक सचिन चवरे यांनी जिल्हा परिषदेच्या मुख्य कार्यकारी अधिकाऱ्यांच्या मार्गदर्शनाखाली बचतगटांची चळवळ जिल्हाभर पसरविली आहे. किमान दहा गरजू महिला एकत्रित येऊन बचतगट स्थापन करू शकतात. सध्या बचत गटांच्या माध्यमातून जिल्ह्यातील अडीच लाख महिला दरमहा अंदाजे पाच कोटी रुपयांची बचत करतात. खास बाब म्हणजे आतापर्यंत महिला बचतगटांनी घेतलेले कोणत्याही बॅंकेचे कर्ज थकलेले नाही. त्यामुळे बॅंकांकडून पहिल्या कर्जाची परतफेड झाल्यानंतर लगेचच दुसरे कर्ज ऑफर केले जाते.
पहिल्या, दुसऱ्यावेळी घेतलेल्या कर्जाची वेळेत परतफेड झाल्यानंतर लगेचच बॅंकांकडून जादा कर्ज दिले जाते. महिला आर्थिक विकास महामंडळ आणि ग्रामीण जीवनोन्नती अभियानाअंतर्गत हे बचतगट चालविले जातात. गरजू महिलांच्या बचतगटांना वेळेत बॅंकांकडून कर्ज मिळावे म्हणून दोन्ही कार्यालयांकडून विशेष प्रयत्न केले जातात. कमी व्याजदराने मिळालेल्या या कर्जामुळे अनेक महिलांच्या मुलींचा विवाह, मुला-मुलींचे शिक्षण यासह कौटुंबिक अडचणींवर मात करता आल्याचीही वस्तुस्थिती आहे. जिल्ह्यातील प्रत्येक गावात बचतगट असल्याने शासनाकडून यंदा जिल्ह्यात केवळ ५० नवीन गट स्थापन करण्याचे उद्दिष्ट प्राप्त झाले आहे.
जिल्ह्यातील बचत गटांचे जाळे
एकूण बचतगट
२४,०००
बचतगटांशी संलग्नित महिला
२.४७ लाख
कर्ज मिळणारे गट
१२,८००
कर्जवाटपाचे उद्दिष्ट
३२० कोटी
बचतगट स्थापन कसे करतात? वाचा...
महाराष्ट्र राज्य ग्रामीण जीवनोन्नती अभियानाअंतर्गत बचत गट स्थापन करताना दहा महिलांनी एकत्रित येणे अपेक्षित आहे. गटाचे नाव, ठराव करून सर्व पदाधिकाऱ्यांची माहिती (प्रत्येकाचे आधारकार्ड, बॅंक पासबुक) तालुक्याच्या कार्यालयात जमा करावे लागते. तेथून कार्यालयाचे पत्र घेऊन बॅंकेत गटाच्या नावे खाते उघडावे लागते. त्यानंतर दरमहा काही रक्कम बचत म्हणून गोळा केली जाते. सहा महिन्यानंतर कर्जासाठी तालुक्याच्या कार्यालयात गेल्यास गटाच्या कार्यक्षेत्रातील बॅंकेतून सुरवातीला एक ते दीड लाखांपर्यंत कर्ज मिळते. कर्जफेड वेळेत केल्यास कर्जाची मर्यादा वाढते.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.