CP Radhakrishnan : लोकशाही अबाधित राहण्यासाठी सहकार्य करा; राज्यपाल सी. पी. राधाकृष्णन यांचे आवाहन

मुंबई - ‘भारत जगातील सर्वात मोठी चौथी अर्थव्यवस्था बनला आहे. भारताच्या या वेगवान विकासात लोकशाहीने आपले महत्त्व अधोरेखित केले आहे. भारतीय परंपरेमुळे असणारी लोकशाही अबाधित राहण्यासाठी आपण सर्वांनीच सहकार्य करूयात,’ असे आवाहन राज्यपाल सी. पी. राधाकृष्णन यांनी केले..आणीबाणीच्या ५० वर्षानिमित्ताने संविधान हत्या दिवस कार्यक्रम राजभवनामध्ये आयोजित करण्यात आला होता. यानिमित्ताने आणीबाणीत कारावास भोगलेल्यांचा ‘लोकतंत्र सेनानी’ म्हणून सत्कार करण्यात आला.यावेळी मुख्यमंत्री देवेंद्र फडणवीस, उपमुख्यमंत्री एकनाथ शिंदे, विधान परिषद उपसभापती डॉ.नीलम गोऱ्हे, कौशल्य विकास मंत्री मंगलप्रभात लोढा, सांस्कृतिक कार्यमंत्री ॲड.आशिष शेलार, आदिवासी विकास मंत्री प्रा. अशोक उईके आदी उपस्थित होते..आणीबाणी ही प्रत्येक भारतीयाच्या मनातील सल असल्याचे सांगत राज्यपाल सी. पी. राधाकृष्णन म्हणाले, ‘आणीबाणी ही देशावर लादली गेली. या काळात देशविघातक कार्य झाले. जो कुणी आणीबाणीचा विरोध करेल त्याला कारागृहात डांबले जायचे.त्या काळात नागरिकांना असह्य अत्याचार सहन करावे लागले. आणीबाणीमुळे देशातील लोकशाहीवरच घाला घालण्यात आला. राज्यघटनेने दिलेल्या मूलभूत अधिकारांवर गदा आणण्यात आली. त्यातूनच आणीबाणीविरोधात जनमत तयार झाले.’’.ते म्हणाले, ‘आपल्या विचारात, कार्यात व भविष्यातील योजनांमध्ये राष्ट्र प्रथम असले पाहिजे. स्वत:साठी न जगता राष्ट्रासाठी जगता आले पाहिजे. दुसऱ्यांसाठी जगा, हा मंत्र भारतीय लोकशाहीने दिला आहे. आज जगामध्ये सर्वांत मोठी लोकशाही असणारा आपला भारत देश आहे. भारत विकसित देश होण्याकडे आगेकूच करीत आहे.विकासाच्या प्रवासाचा येथपर्यंतचा टप्पा हा मजबूत लोकशाहीमुळेच शक्य झाला आहे, त्यामुळे लोकशाहीला अधिकाधिक बळकट करण्यासाठी प्रत्येक भारतीयाने निश्चय केला पाहिजे,’ असे आवाहनही राज्यपालांनी यावेळी केले..भारतीयाच्या मनात लोकशाही : फडणवीसआणीबाणी ही भारतीय लोकशाहीवरील हल्ल्याचा प्रयत्न होता. मात्र आणीबाणीला विरोधासाठी कारावास भोगलेल्या लोकतंत्र सेनानींनी मोठा लढा देत हा प्रयत्न हाणून पाडला. त्या कृतज्ञतेच्या भावनेतून त्यांना मानधन देवून शासन त्यांचे ऋण फेडण्याचा प्रयत्न करीत आहे.प्रत्येक भारतीयाच्या मनात प्रबळ लोकशाहीची बीजे रोवली आहेत आणि म्हणूनच आणीबाणीमुळे सेनानींचे कुठल्याही प्रकारचे मानसिक खच्चीकरण होवू शकले नाही, अशा शब्दांत मुख्यमंत्री देवेंद्र फडणवीस यांनी लोकतंत्र सेनानींचा गौरव केला..अघोषित आणीबाणीचे काय? - सपकाळदेशातील तत्कालीन परिस्थितीमुळे इंदिरा गांधी यांना आणीबाणीचा निर्णय घ्यावा लागला होता. त्यावेळी झालेल्या काही घटनांवर इंदिरा गांधी, सोनिया गांधी आणि राहुल गांधी यांनी प्रशासनाकडून काही चुका झाल्याचे मान्य केले. पण भाजप आणीबाणीवर फक्त कांगावा करत आहे. सरसंघचालक बाळासाहेब देवरस यांनी आणीबाणीचे समर्थन केले होते.जयप्रकाश नारायण यांच्या आंदोलनाशी संघाचा संबंध नाही, असेही जाहीर केले होते. त्यामुळे भाजपला बाळासाहेब देवरसांची भूमिका मान्य नाही का? गेल्या ११ वर्षांपासून देशात सुरु असलेल्या अघोषित आणीबाणीचे काय? असा सवाल काँग्रेस प्रदेशाध्यक्ष हर्षवर्धन सपकाळ यांनी बुधवारी केला..भाजपच्या नेतृत्वाखालील राज्य सरकारने आज आणीबाणीला ५० वर्षे पूर्ण झाल्यानिमित्त आज राजभवन येथे एका शासकीय कार्यक्रमाचे आयोजन केले होते. या कार्यक्रमात ‘भारतीय इतिहासातील काळाकुट्ट अध्याय, संविधान हत्या दिवस २०२५’ निमित्ताने लोकतंत्र सेनानींच्या सत्कार करण्यात आला. यावरून काँग्रेसने आज भाजपवर जोरदार टीका केली.तत्कालीन पंतप्रधान इंदिरा गांधी यांनी जून १९७५ मध्ये देशात आणीबाणी लागू करण्याचा जो निर्णय घेतला होता तो संविधानिक होता. देशात काही शक्ती अराजक निर्माण करू पाहत होत्या. नंतर आणीबाणी उठवून निवडणुका घेतल्या आणि लोकशाही प्रक्रिया पार पाडली. इंदिरा गांधी यांनी आणीबाणीवेळी देशाची संपत्ती विकली नाही..सार्वजनिक क्षेत्रातील कंपन्या उद्योगपतींच्या घशात घातल्या नाहीत. पण देशात मागील ११ वर्षांपासून विमानतळे, बंदरे, खाणी, बँका, सरकारी जमिनी ‘लाडक्या उद्योगपती’ला विकल्या जात आहेत. धारावीची जमीन विकली आहे. देशात आज हुकूमशाही असून भाजपचा भस्मासुर लोकशाही गिळू पाहत आहे, अशी टीका सपकाळ यांनी पत्रकार परिषदेत बोलताना केली..हिंदीबाबतचा निर्णय रद्द करण्यास भाग पाडूपहिलीपासून हिंदी भाषा लादण्याचा राज्य सरकारचा निर्णय अत्यंत चुकीचा असून अन्यायकारक त्रिसूत्री भाषा धोरण खपवून घेतले जाणार नाही, असे ठणकावत हिंदी भाषेची सक्ती करण्याचा निर्णय रद्द करण्यास सरकारला भाग पाडू, असा इशाराही काँग्रेसचे प्रदेशाध्यक्ष हर्षवर्धन सपकाळ यांनी दिला.मराठी अभ्यास केंद्रातील डॉ. दीपक पवार आणि चिन्मयी सुमीत, राज असोंडकर, गिरीश सामंत, साधना गोरे व सुशील शेजुळे यांनी सपकाळ यांची आज टिळक भवन येथे भेट घेऊन मराठी भाषा आणि शिक्षण धोरणासंदर्भात सविस्तर चर्चा केली..सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.