देशाचे पंतप्रधान नरेंद्र मोदीजी राजीनामा देण्याचे धाडस दाखवतील का ?

मुंबई : युक्रेनची स्थिती रशियाच्या हल्ल्यांमुळे दिवसेंदिवस चिंताजनक बनत चालली आहे. मंगळवारी (ता.एक) रशियाच्या हल्ल्यात एका भारतीय विद्यार्थ्याचा मृत्यू झाला आहे. नवीन शेखरप्पा असे त्या तरुणाचे नाव आहे. नवीनच्या मृत्यूमुळे नरेंद्र मोदी यांच्यासह त्यांच्या सरकारवर टीका होत आहे. युक्रेनमध्ये (Ukraine) अडकलेल्या अनेक भारतीय विद्यार्थ्यांनी मदत मिळत नसल्याच्या व्यथा सोशल मीडियावर व्हिडिओ शेअर करुन देशवायांना सांगितले आहे. नवीनच्या मृत्यूवरुन राष्ट्रवादी काँग्रेस पक्षाचे आमदार अमोल मिटकरी (Amol Mitkari) यांनी आज बुधवारी (ता.दोन) पंतप्रधान नरेंद्र मोदी (Narendra Modi) यांच्यावर टीका केली आहे. (Is Prime Minister Narendra Modi Dare To Resignation?, Says Amol Mitkari)

मिटकरी आपल्या ट्विटमध्ये म्हणतात, की युक्रेनमध्ये भारतीय विद्यार्थ्यांचा दुर्दैवी मृत्यू झाला. या घटनेची नैतिक जबाबदारी स्वीकारुन देशाचे पंतप्रधान नरेंद्र मोदीजी राजीनामा देण्याचे धाडस दाखवतील का? की फक्त 'मन की बात' मध्ये श्रद्धांजली वाहत बसतील?, असा खोचक टोला अमोल मिटकरी यांनी मोदी यांना लगावला आहे. काँग्रेस पक्षाचे नाना पटोले, मंत्री जितेंद्र आव्हाड, रोहित पवार आदींनी या घटनेबाबत प्रतिक्रिया नोंदविला आहेत.