Recruitment : राज्यात कारागृह विभागासाठी भरती प्रक्रिया सुरू; अमिताभ गुप्ता यांची माहिती

पुणे - ‘महाराष्ट्रातील कारागृह विभागासाठी नव्याने दोन हजार पदे निर्माण करण्यात आली आहेत. विविध २५५ पदांसाठी भरती प्रक्रिया सुरू आहे. त्यामुळे पुरेसे प्रशिक्षित मनुष्यबळ उपलब्ध होणार असून, कारागृह सुरक्षा व्यवस्था अधिक बळकट होईल,’ असा विश्वास अतिरिक्त पोलिस महासंचालक (कारागृह व सुधारसेवा) अमिताभ गुप्ता यांनी व्यक्त केला.

येरवडा येथील दौलतराव जाधव तुरुंग अधिकारी प्रशिक्षण महाविद्यालयात मंगळवारी (ता. १६) आयोजित आधुनिक संगणक प्रयोगशाळा आणि दूरदृष्य प्रणाली (व्हिडिओ कॉन्फरन्स) कक्षाच्या उद॒घाटनप्रसंगी गुप्ता बोलत होते. विशेष पोलिस महानिरीक्षक (कारागृह) डॉ. जालिंदर सुपेकर, कारागृह उपमहानिरिक्षक स्वाती साठे, येरवडा मध्यवर्ती कारागृहाचे अधीक्षक सुनील ढमाळ, दौलतराव जाधव तुरुंग अधिकारी प्रशिक्षण महाविद्यालयाचे प्राचार्य नितीन वायचळ, फिनोलेक्स इंडस्ट्रीजच्या मुकुल माधव फाउंडेशनच्या व्यवस्थापकीय विश्वस्त रितू छाब्रिया, अनिल बाबी, बबलू मोकाले आदी या वेळी उपस्थित होते.

गुप्ता म्हणाले, ‘फिनोलेक्स इंडस्ट्रीज आणि मुकुल माधव फाउंडेशनच्या सामाजिक उत्तरदायित्व (सीएसआर) निधीतून कारागृह विभागातील अधिकारी आणि कर्मचाऱ्यांसाठी ई-लर्निंग, ई-लायब्ररी, व्हर्च्युअल क्लासरूम, अद्ययावत संगणक प्रयोगशाळा अशा सुविधा सुरू करण्यात आल्या आहेत. या अद्ययावत सुविधांचा अधिकारी, कर्मचाऱ्यांनी लाभ घ्यावा. या कौशल्य प्रशिक्षणातून चांगले अधिकारी, कर्मचारी आणि प्रशिक्षक निर्माण होतील.’’