Nana Patole : बिनविरोध नाहीच! कसबा, चिंचवड निवडणुकीबाबत पटोलेंची मोठी घोषणा; घटकपक्षांबाबतही विधान

पुणेः पुण्यातील कसबा आणि चिंचवड विधानसभा पोटनिवडणुकीची रणधुमाळी सुरु आहे. भाजपने दोन्ही ठिकाणचे उमेदवार घोषित केलेले आहेत. मात्र महाविकास आघाडीच्या अद्यापही बैठका सुरु आहेत. काँग्रेस प्रदेशाध्यक्ष नाना पटोले यांनी काही वेळापूर्वी ट्विट करुन मोठं विधान केलं आहे.

पुण्यातील कसबा आणि चिंचवडमध्ये होऊ घातलेल्या पोटनिवडणुकीसाठी काल भाजपने उमेदवार जाहीर केले आहेत. हेमंत रासने यांना कसब्यातून भाजपकडून उमेदवारी घोषित करण्यात आली आहे. तर चिंचवडमध्ये अश्विनी जगताप यांना उमेदवारी देण्यात आली आहे. या निवडणुकीत भाजपने दिवंगत मुक्ता टिळक यांच्या कुटुंबाला डावललं आहे.

दरम्यान, काही वेळापूर्वी नाना पटोले यांनी ट्विट करुन सांगितलं की, पुणे जिल्ह्यातील चिंचवड व कसबा मतदारसंघात विधानसभेची पोटनिवडणूक महाविकास आघाडीचे सर्व घटकपक्ष एकत्रित लढणार आहेत. कसबा मतदारसंघाची जागा काँग्रेस पक्ष आणि चिंचवड मतदारसंघाची जागा राष्ट्रवादी काँग्रेस पक्ष लढवणार असल्याचा निर्णय झाला आहे.

नाना पटोले यांच्या या ट्विटमुळे कसबा आणि चिंचवड विधानसभा निवडणुका बिनविरोध होणार नाहीत, हे स्पष्ट झालेलं आहे.आमदार मुक्ता टिळक यांच्या निधनामुळे कसबा विधानसभा मतदारसंघात पोटनिवडणूक होत आहे. त्यामुळे टिळक कुटुंबातील सदस्यालाच उमेदवारी मिळेल अशी चर्चा होती. मात्र भाजपने त्यांच्या जागी हेमंत रासने यांनी उमेदवारी दिली आहे.