किरीट सोमय्या कोल्हापुरात दाखल; थोड्याच वेळात घेणार अंबाबाईच दर्शन

कोल्हापूर : भारतीय जनता पक्षाचे राष्ट्रीय उपाध्यक्ष किरीट सोमय्या कोल्हापुरात दाखल झाले आहेत. यावेळी भाजपच्या महिला कार्यकर्त्यांनी त्यांचे औक्षण केले. तर पदाधिकाऱ्यांनी पुष्पगुच्छ देऊन स्वागत केले. थोड्याच वेळात ते आंबाबाईचे दर्शन घेऊन मुरगूडला रवाना होणार आहेत. दरम्यान, आंबाबाई मंदिरात पोलीस बंदोबस्त तैनात करण्यात आला आहे. आज दिवसभर ते पक्षाच्या कार्यकर्त्यांची बैठक घेणार आहेत. मुरगूडातून कोल्हापूरला येवून ते पत्रकारांशी संवाद साधणार आहेत.

भाजपचे माजी खासदार किरीट सोम्मया मुरगूड पोलीस ठाण्यात ग्रामविकासमंत्री हसन मुश्रीफ यांच्या विरोधात तक्रार दाखल करण्यासाठी आज (मंगळवारी, ता.28) दुपारी मुरगूडात येणार असल्याच्या पार्श्वभूमीवर शहरात भरणारा आठवडी बाजार बंद ठेवण्यात आला आहे. मात्र शहरातील सर्व दुकाने व अन्य व्यवहार सध्या सुरळीत सुरु आहेत.स्थानिक पोलीस यंत्रणा या सर्वांवर लक्ष ठेवून आहे. सध्या पावसाची रिपरिप सुरु असल्यामूळे बाजारपेठेत फारशी वर्दळ पहावयास मिळत नाही.

खुद्द ग्रामविकासमंत्री हसन मुश्रीफ यांनीच आपल्या कार्यकर्त्यांना सोम्मयांच्या दौऱ्यात अडथळा करु नये.असे आवाहन केल्यामुळे त्यांच्या दौऱ्याबद्दलची उत्सुकता कमी झाल्याचे निदर्शनास येते. तीन दिवसापूर्वी किरीट सोम्मया यांनी आपला कोल्हापूर दौरा पुन्हा जाहीर केला.त्यात त्यांनी दुपारी 12.30 वाजता आपण मुरगूड पोलीस ठाण्यात येणार असल्याचे नमूद केले आहे. मुरगूडचा आठवडा बाजार हा मुख्य बाजारपेठेत तसेच मुरगूड पोलीस ठाण्याकडे जाणाऱ्या मार्गावरच भरत असल्याने तो बंद ठेवण्याचा निर्णय प्रशासनाने घेतला आहे. असे असले तरी कोरोनाच्या पार्श्वभूमीवर बाजार बंद केल्याचे सांगितले जात आहे.

शहरातील बाजारपेठेत असणारी सर्व दुकाने,तसेच सर्व व्यवहार सुरळीतपणे सुरु आहेत. शहरात सध्या स्ट्रायकिंग फोर्सचे 20 जवान,स्थानिक पोलीस अधिकाऱ्यांसह 20 पोलीस कर्मचारी असे 40 पोलीस या सर्व घडामोडीवर लक्ष ठेवून आहेत.बाजार पेठेत ठिकठिकाणी बंदोबस्तासाठी पोलीस कर्मचारी तैनात आहेत.