Shivsena News: CM एकनाथ शिंदे आता 'या' तीन पदावर राज करणार का? चर्चेला उधाण

CM Eknath Shinde News: शिवसेना नाव आणि चिन्ह धनुष्यबाण मिळाल्यानंतर आता शिंदे गट अ‍ॅक्शनमोडमध्ये आलाय. शिंदे गटाची आज राष्ट्रीय कार्यकारिणी सदस्यांची बैठक होणार आहे. दरम्यान, मुख्यमंत्री एकनाथ शिंदे नेमकं कोणतं पद स्विकारणार असा सवाल उपस्थित होत आहे.(Maharashtra Politics Shiv Sena Cm Eknath Shinde post chief leader)

केंद्रीय निवडणुक आयोगाच्या निर्णयानंतर आज मुख्यमंत्री एकनाथ शिंदे यांच्या उपस्थितीत, शिवेसना पक्षाची पहिली कार्यकारणी ठरवण्या संदर्भातची बैठक होणार आहे. ही बैठक संध्याकाळी ७ वाजता दक्षिण मुंबईतील ताज प्रेसिडेंसी या हॅाटेलमध्ये होणार आहे.

या बैठकीला शिवसेनेचे सर्व खासदार, आमदार आणि इतर प्रमुख पदाधिकारी उपस्थित राहणार आहेत. ही बैठक संपल्यानंतर बैठकीतून निर्णय जाहीर करण्यासाठी, शिवसेना पक्षाची पत्रकार परीषद ही होणार आहे.

निवडणुक आयोगाच्या निर्णयानंतर बाळासाहेबांची शिवसेना पक्षात मुख्यमंत्री एकनाथ शिंदे यांना पक्षाचे “मुख्य नेते” असे पद देण्यात आले होते. त्या ऐवजी आता पक्षाला अधिकृत शिवसेना हे नाव आणि धनुष्यबाण हे निवडणूक चिन्ह मिळाल्यानंतर मुख्यमंत्री एकनाथ शिंदे यांच्यासाठी तीन सर्वोच्च पदाचा विचार कार्यकारिणी करत असल्याची माहिती समोर आलीय.

शिवसेना पक्ष प्रमुख, शिवेसना अध्यक्ष, शिवेसना मुख्य नेता अशी ही तीन पदं आहेत. मिळालेल्या माहितीनुसार, या पैकी एक पद मुख्यमंत्री एकनाथ शिंदे यांना देण्या संदर्भात, कार्यकारणी बैठकीत महत्वाचा निर्णय होणार आहे.

वरिष्ठ सूत्रांनी दिलेल्या माहितीनुसार, मुख्यमंत्री एकनाथ शिंदे यांची पुन्हा एकदा “मुख्य नेते” पदावर सर्वानुमते निवड करण्यात येणार आहे.

शिवसेनेचे संसदीय नेते म्हणून जेष्ठ खासदार गजानन किर्तीकर यांच्या नावावर शिक्कामोर्तब होणार असल्याचीही माहिती वरिष्ठ सूत्रांनी दिली आहे.