Maharashtra Politics: वज्रमूठ सभा मविआची पण खरा लढा उद्धव ठाकरेंचा; राजकीय वर्तुळात रंगली चर्चा

छत्रपती संभाजीनगरात आज होणारी महाविकास आघाडीची वज्रमुठ सभा वादळी ठरण्याची शक्यता आहे. या सभेला महाविकास आघाडीतील सर्व प्रमुख नेते उपस्थित राहणार आहेत. पण खरी लढत ही माजी मुख्यमंत्री उद्धव ठाकरेंची असल्याची चर्चा राजकीय वर्तुळात रंगली आहे. या चर्चेमागचे कारणही तसेच आहे.

शिवसेना ठाकरे गटाचे प्रमुख उद्धव ठाकरे, विरोधी पक्षनेते अजित पवार, काँग्रेसचे प्रदेशाध्यक्ष नाना पटोले, काँग्रेसचे नेते अशोक चव्हाण यांच्यासह इतर प्रमुख नेते या सभेला उपस्थित राहणार असल्यानं या सभेकडं राज्याचं लक्ष लागलं आहे. गेल्या काही दिवसांपासून या सभेवरून राज्यातील राजकीय वातावरण चांगलंच तापलं असून, विरोधक आणि सत्ताधारी आमने-सामने आल्याचं पहायला मिळत आहे.

शॉर्ट सेलर्स म्हणजे नक्की कोण?

अशातच सोशल मीडियावर कॅम्पेनिंग पाहता अनेक सवाल उपस्थित होत आहेत.

वज्रमूठ सभेच्या आयोजनात शिवसेना उद्धव बाळासाहेब ठाकरे, काँग्रेस आणि राष्ट्रवादी काँग्रेस हे तीन पक्ष सहभागी असले तरी सभेच्या यशस्वितेसाठी उद्धव ठाकरे गटाकडून अधिक प्रयत्न सुरू असल्याचे पाहायला मिळत आहे.

सभेच्या ठिकाणी स्तंभपूजन, सभेचे निमंत्रण, कामाची पाहणी, सोशल मीडियावर कॅम्पेनिंग या सर्व गोष्टींत उद्धव ठाकरे गटाने पुढाकार घेतल्याची माहिती मिळाली आहे.

निमंत्रण पत्रिकेवर उद्धव ठाकरे

सोशल मीडियावर कॅम्पेनिंग पाहता काँग्रेस आणि राष्ट्रवादी यांच्या ट्विटर हँडेलवर वज्रमुठ सभेचे कॅम्पेनिंग खुप कमी प्रमाणात पाहायला मिळत आहे. ठाकरेंच्या शिवसेना ट्विटर हँडेल पाहता उद्धव ठाकरेंचा मोठा फोटो दिसत आहे.

तसेच जाहीर सभेच्या निमंत्रण पत्रिकेवर बाळासाहेब ठाकरे व मीनाताई ठाकरे यांचे मोठे छायाचित्र वापरले आहे. त्याचबरोबर उद्धव ठाकरे यांचेही मोठे छायाचित्र आहे. काँग्रेसच्या नेत्या सोनिया गांधी, राष्ट्रवादीचे अध्यक्ष शरद पवार, विरोध पक्षनेते अजित पवार, काँग्रेसचे प्रदेशाध्यक्ष नाना पटोले यांची लहान आकारातील छायाचित्रे निमंत्रण पत्रिकेवर छापली आहेत.

शिवसेनेचा बालेकिल्ला म्हणून ओळखल्या जाणाऱ्या छत्रपती संभाजीनगर जिल्ह्यातून पाच आमदारांनी बंडखोरी करत शिंदे सेनेत प्रवेश केला. त्यातील दोघांना मंत्रिपददेखील मिळाले. त्याला उत्तर म्हणून विधान परिषदेचे विरोधी पक्षनेतेपद याच शहरात देण्यात आले. त्यामुळे अजूनही उद्धव सेनेची संघटना कायम आहे. त्याच जाेरावर छत्रपती संभाजीनगरात वज्रमूठ सभेचे आयोजन केले आहे.