आमदाराकडून 'छोटे सीएम' असा उल्लेख; श्रीकांत शिंदेंनी लावला डोक्याला हात.. पाहा Video

उल्हासनगर आणि कल्याण शहराला जोडणाऱ्या वालधुनी नदीवरील बांधण्यात आलेल्या नवीन पुलाचे रविवारी खासदार श्रीकांत शिंदे आमदार कुमार आयलानी, गणपत गायकवाड यांच्या हस्ते उद्घाटन करणअयात आले. दरम्यान या कार्यक्रमानंतर माध्यमांशी बोलताना उल्हासनगरचे आमदार आयलानी यांनी मोठे सीएम एकनाथ शिंदे तर छोटे सीएम श्रीकांत शिंदे असा उल्लेख केल्याने राजकीय वर्तुळात चर्चा सुरू झाली आहे.

सध्या हा व्हिडीओ सोशल मिडीयावर व्हायरल होत आहे. या व्हिडीओमध्ये शांतीनगरपासून कल्याणला जोडणाऱ्या पुलाचे आज खासदार श्रीकांत शिंदे गणपत गायकवाड आणि मी उद्घाटन केले. बाजूलाचा बांधलेल्या छोट्या पूलाच्या बाजूला हा पूल बांधण्यात आला असून याला सव्वा पाच कोटींचा खर्च आल्याचे आयलानी यांनी सांगितलं. उल्हासनगरचा विकास करणं आमचं लक्ष आहे, असेही ते म्हणाले.

धोकादायक इमारतींना रेग्युलराइज करण्यासाठी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी दिलेल्या निधीबद्दल त्यांनी आभार मानले. यावेळी त्यांनी खासदार श्रीकांत शिंदे यांनी उल्हासनगर मधील रस्त्यांच्या कॉंक्रेटीकरणासाठी निधी देण्याची मागणी देखील त्यांनी केली.

यावेळी बोलताना श्रीकांत शिंदे यांचा आमदार आयलानी यांनी छोटे सीएम असा उल्लेख केला. हे आमचे छोटे सीएम आहेत, तसेच एकनाथ शिंदे मोठे सीएम असल्याचे म्हटले. यावेळी श्रीकांत शिंदे यांनी डोक्याला हात लावल्याचे दिसून आले. दरम्यान आमदाराने छोटे सीएम असा उल्लेख केल्याने राजकीय वर्तुळात चर्चा सुरू झाली आहे.