Shiv Jayanti : छत्रपती शिवाजी महाराजांनी पेटवलेली क्रांतीची मशाल..; काय म्हणाले उदयनराजे?

Shivaji Maharaj Jayanti 2023 : छत्रपती शिवाजी महाराजांची जयंती आज (19 फेब्रुवारी) सर्वत्र साजरी होत आहे. छत्रपती शिवाजी महाराजांची यंदा 393 वी जयंती आहे.

तसंच, यावर्षी छत्रपती शिवाजी महाराजांच्या राज्याभिषेकाला 350 वर्षे पूर्ण होत आहेत. शिवाजी महाराजांनी स्वराज्य रक्षणासाठी उभारलेले गड-किल्ले जगभरातील पर्यटनप्रेमींचं मुख्य आकर्षण आहे. शिवाजी महाराजांमुळं महाराष्ट्राची ओळख जगभरात पोहोचलीये.

आज याच पार्श्वभूमीवर, छत्रपती शिवाजी महाराजांचे थेट तेरावे वंशज आणि खासदार उदयनराजे भोसले (Udayanraje Bhosale) यांनी ट्विटव्दारे महाराजांना जयंतीदिनी अभिवादन केलंय. छत्रपती शिवराय म्हणजे, मातृभूमीला लाभलेलं एक बहुमूल्य वरदान आहे. महाराजांनी पेटवलेली क्रांतीची मशाल पिढ्यानपिढ्या पुढं सरसावत आहे एखाद्या झंझावाताप्रमाणं.. म्हणूनच, छत्रपती शिवाजी महाराज आजही सर्वांच्या श्वासात, मनात, हृदयात, जगण्यात वसतात असं उदयनराजेंनी म्हटलंय.

शून्यातून स्वराज्य उभारुन नवा इतिहास रचणाऱ्या शिवरायांनी दाखवून दिलेल्या मार्गावरुन चालण्याचा निश्चय करुयात, असं सांगत त्यांनी संपूर्ण देशवासियांना शिवजयंतीच्या शुभेच्छा दिल्या आहेत. दरम्यान, छत्रपती शिवाजी महाराजांना मानाचा मुजरा करण्यासाठी आणि महाराष्ट्राच्या लोकसंस्कृतीविषयी अभिमान व्यक्त करण्यासाठी शिवजयंतीच्या दिवशी सर्वत्र विविध कार्यक्रमांचं आयोजन करण्यात येत आहे. या दिवशी किल्ले शिवनेरीवर शिवजन्मोत्सव सोहळा साजरा करण्यात येत असतो.