CM Shinde : अभिनेत्याचा 'कार'नामा! सी-लिंकवर टोल वाचावा म्हणून मुख्यमंत्र्याच्या ताफ्यातून नेली कार; पोलिसांनी घडवली अद्दल

मुंबईः मुंबईतल्या वांद्रे-वरळी सी लिंकवर मुख्यमंत्री एकनाथ शिंदे यांच्या ताफ्याला फॉलो करणाऱ्या ३० वर्षीय अभिनेत्याला पोलिसांनी ताब्यात घेतलं आहे. शुभम कुमार असं या तरुणाचं नाव असून त्याने व्हीआयपी लेनमध्ये घसून टोल ओलांडला होता.

वांद्रे पोलिस ठाण्याच्या अधिकाऱ्यांना सांगितलं की, शुभम कुमार हा त्याच्या कुटुंबासह कारमध्ये होता. सोमवारी त्यांने आपली कार मुख्यमंत्र्यांच्या ताफ्यातून नेली. ड्युटीवर असलेल्या ट्रॅफिक कॉन्स्टेबलला ही बाब लक्षात आल्यानंतर त्याने त्याला थांबण्याची सूचना केली. मात्र तो थांबला नाही.

शुभम कुमार याने कार थांबवली नसल्याने त्याला वरळीजवळ पकडण्यात आलं आणि वांद्रे पोलिसांच्या स्वाधीन करण्यात आलं. त्यानंतर पोलिसांनी त्याच्यावर अटकेची कारवाई केली.

पोलिसांनी त्याची चौकशी केली असता त्याने ठाण्यातूनच मुख्यमंत्र्यांचा ताफा फॉलो केल्याचं सांगितलं. मुख्यमंत्री त्यांचे शासकीय निवासस्थान 'वर्षा'कडे जात होते. वरळी सी लिंकवरुन जाताना टोल भरावा लागू नये, यासाठी मुख्यमंत्र्यांचा ताफा फॉलो केल्याचं त्यांने सांगितलं.

शुभम कुमार याच्यावर भारतीय दंड संहितेच्या कलमान्वये निष्काळजीपणे वाहन चालविणे आणि मोटार वाहन कायद्याच्या तरतुदींनुसार गुन्ह्याची नोंद करण्यात आलेली आहे. 'डेक्कन हेराल्ड'ने हे वृत्त दिले आहे.