NCP Crisis : भविष्यात राष्ट्रवादीचे दोन्ही गट एकत्र येणार? दिलीप वळसे-पाटलांचं 'साहेब-दादां'बाबत परखड भाष्य

सातारा : राष्ट्रवादीच्या (NCP) घड्याळ चिन्हाबाबतचा निर्णय निवडणूक आयोग करेल. त्यावर अधिक सांगता येणार नाही; पण भविष्यात राष्ट्रवादीचे दोन्ही गट एकत्र येतील, असे वाटत नाही, असे स्पष्ट मत राष्ट्रवादी अजित पवार गटाचे नेते व सहकारमंत्री दिलीप वळसे- पाटील (Dilip Walse-Patil) यांनी व्यक्त केले.

सहकारमंत्री वळसे- पाटील काल (शनिवार) रयत शिक्षण संस्थेच्या विविध कार्यक्रमांच्या निमित्ताने साताऱ्यात आले आहेत. या वेळी त्यांच्याशी शासकीय विश्रामगृहात पत्रकारांनी संवाद साधला. श्री. वळसे पाटील यांनी जयंत पाटील आणि एकनाथ खडसे यांच्या वक्तव्यावर बोलणे टाळले.

राष्ट्रवादीचे खासदार शरद पवार (Sharad Pawar) व उपमुख्यमंत्री अजित पवार (Ajit Pawar) हे दोन्ही गट सध्या लोकसभेच्या निवडणुकीच्या निमित्ताने चिन्हाच्या प्रश्नावरून आमनेसामने आहेत. दोन्हीपैकी कोणत्या गटाला घड्याळ चिन्ह मिळेल, असे आपल्याला वाटते, या प्रश्नावर श्री. वळसे- पाटील म्हणाले, ‘‘घड्याळ चिन्हासंदर्भातील निर्णय निवडणूक आयोग करेल; पण ऐनवेळी हे दोन गट एकत्र येतील, असे मला वाटत नाही.’’

अजित पवारांचे समर्थक व पिंपरी चिंचवडचे माजी महापौर संजोत वाघेरे यांनी आज उद्धव ठाकरे गटात प्रवेश केला आहे, याबाबत वळसे पाटील म्हणाले, ‘‘वाघेरे यांना या आधी संधी दिली होती. त्या ठिकाणी दुसरे नेतृत्व तयार झाले आहे. कदाचित त्यांचे नाव यादीत येणार नाही हे कळाल्यामुळेच त्यांनी उद्धव ठाकरे यांच्यासोबत जाण्याचा हा निर्णय घेतला असावा.’’

अजित पवार यांनाच अध्यक्ष करण्यासाठी खासदार शरद पवार यांनी बैठक बोलावली होती. मात्र, तेव्हा अजित पवार अध्यक्षपद नको म्हणाले होते, असे जयंत पाटील यांनी म्हटले होते. याबाबत वळसे पाटील म्हणाले, ‘‘माझ्यासमोर अशी चर्चा झाली नव्हती. मला त्याबाबत काहीही माहीत नाही.’’ ठेकेदारांना निवडणुकीपूर्वी ३३०० कोटींचा ठेका देण्याचा प्रयत्न दिसतोय, असा आरोप एकनाथ खडसे यांनी सरकारवर केला होता. त्याबाबतही वळसे पाटील यांनी मौन बाळगत हा प्रश्न अजित पवार यांनाच विचारा, असे ते म्हणाले.