Rohit Pawar : मी मंत्रीपदासाठी लाचार झालो नाही आणि नियत कुठं विकलेली नाही; रोहित पवारांची शिरसाटांवर सडकून टीका

कऱ्हाड : संजय शिरसाट स्वतः प्रवक्ते असल्यामुळं त्यांच्या पोटात कुठंतरी दुखतंय. त्यांना मंत्री व्हायचं आहे, ते स्वतः बोललेले आहेत. आम्ही कुठेही पदासाठी, मंत्रीपदासाठी लाचार झालेलो नाही, आम्ही नियत कुठे विकलेली नाही. तेव्हा तुम्ही कुठलेही राजकीय पतंग उडवू नका, असा टोला आमदार रोहित पवार यांनी शिवसेनेचे नेते शिरसाट यांना लगावला.

आमदार रोहित पवार कोल्हापूर दौऱ्यावर जाण्यापूर्वी त्यांनी कऱ्हाड (जि. सातारा) येथे काहीकाळ थांबून माध्यमांशी संवाद साधला. माजी नगरसेवक सौरभ पाटील, समीर कुडची, संजय पिसाळ यांच्यासह राष्ट्रवादीचे कार्यकर्ते उपस्थित होते.

आमदार पवार म्हणाले, पवार कुटुंबातील व्यक्तीला संधी मिळाल्यानंतर अध्यक्ष व्हायचं असतं तर मी जिल्हा परिषदेचा अध्यक्ष झालो असतो. महाविकास आघाडी सरकारमध्ये मी मंत्री होऊ शकलो असतो. पण, मी झालो का? मला मंत्री कुठे व्हायचं असतं, पदासाठी मी लढत असतो तर मी आज सत्तेच्या बाजूला असतो.

आम्ही पदांसाठी कोठेही भेदभाव करत नाही. परंतु मला पद नको, विचार महत्त्वाचा आहे. संजय शिरसाट स्वतः प्रवक्ते असल्यामुळं त्यांच्या पोटात कुठंतरी दुखतंय. त्यांना मंत्री व्हायचं आहे, ते स्वतः बोललेले आहेत. आम्ही कुठेही पदासाठी, मंत्रीपदासाठी लाचार झालेलो नाही, आम्ही नियत कुठे विकलेली नाही. तेव्हा तुम्ही कुठलेही राजकीय पतंग उडवू नका, असा टोलाही त्यांनी लगावला.

'भरतीतील काळ्याबाजाराविरोधात रस्त्यावर उतरू'

सध्या सुरू असलेल्या भरतीमध्ये काळाबाजार सुरू आहे. सरकार मुद्दामहून खासगी कंपन्यांकडून भरती करत आहे. पेपर अनेक वेळा फुटलेले आहेत. त्यामध्ये एफआयआर दाखल होवूनही सरकार उलट पेपर कुठे फुटला आहे असे म्हणत असेल, तर कुठेतरी चुकीचं घडतंय आणि त्याची पाठराखण सरकार करतंय. पुढच्या काही दिवसांत यामध्ये सुधारणा न झाल्यास शिक्षक भरती, प्राध्यापक भरतीत जो काही काळाबाजार चालला आहे. या विरोधात आम्ही रस्त्यावर उतरू, असा इशाराही आमदार रोहित पवार यांनी दिला.