'नका करू तोंडाची वाफ, नाहीतर...'; राणेंचा महाविकास आघाडीवर घणाघात

राजकीय वर्तुळात दररोज अनेक नव्या घडामोडी घडत असतात. याच घटनांना अनुसरुन विरोधक आणि सत्ताधारी पक्षातील दिग्गज नेतेमंडळी एकमेकांवर टीका टिप्पणी करत असतात. आजही एका कार्टूनवरून भाजपाचे आमदार नितेश राणे यांनी महाविकास आघाडीतील नेत्यांवर टीकास्त्र सोडले आहे. यामध्ये त्यांनी एकच वाक्य लिहले आहे. ते म्हणतात, नका करू तोंडाची वाफ... होईल तुमच्याच जीवाला ताप... असा खोचक चिमटा त्यांनी काढला आहे.

भाजपा आमदार नितेश राणे यांनी केलेल्या एका ट्वीटमध्ये एक कार्टून दिसत आहे. जलयुक्त शिवार अभियान घोटाळाच्या या कार्टूनमध्ये राज्याचे मुख्यमंत्री उद्धव ठाकरे, जलसंपदा मंत्री जयंत पाटील, कॉंग्रेसचे नाना पटोले, विरोधी पक्षनेते देवेंद्र फडणवीस अशी दिग्गज नेतेमंडळी दिसून येत आहे. या योजनेचा बॉम्ब न फुटता फक्त त्याची हवा निघून गेली असल्याने याचे हसे होत आहे, असे दाखवले गेले आहे.

सध्या सुरु असलेल्या आर्यन खान क्रुझ ड्रग प्रकरण आणि त्याला लागून सुरु असलेले समीर वानखडे या दोन मुद्द्यांवर महाविकास आघाडी सरकरामधील कोणत्याही नेत्याने कोणतीच प्रतिक्रीया दिलेली नाही. यावरून विरोधकांकडून हे सरकार गांजा प्रकरणामध्ये सहभागी आहे. त्यांचे संबंध गांजा विकणाऱ्यांशी आहे, अशी वक्तव्य आणि आरोप करत आहेत. आज समीर वानखडे या प्रकरणाविषयी पत्नी क्रांती रेडेकर यांनी मुख्यमंत्री उद्धव ठाकरे यांना एक भावनिक पत्र लिहले आहे.