Chitra Wagh : 'तो' फोटो शेअर करत शिवसेनेने डिवचलं; चित्रा वाघ उत्तर देत म्हणाल्या, कायम घरात बसून...

गेल्या काही दिवसांपासून पेटलेला उर्फी जावेद आणि चित्रा वाघ यांचा उफळलेला वाद शांत झालेला असतानाच शिवसेनेच्या ठाकरे गटाच्या नेत्या मनिषा कायंदे यांनी तो पुन्हा उकरून काढला आहे. चित्रा वाघ आणि उर्फी जावेद हा वाद गेल्या काही दिवसांपासून शांत होता मात्र आज मनिषा कायंदे यांनी ट्विटर वर एका शरीर सौष्ठव स्पर्धेतील महिला बॉडी बिल्डरचा फोटो ट्विट करत चित्रा वाघ यांना डिवचलं आहे.

त्याला भाजपच्या चित्रा वाघ यांनीही त्यांच्या प्रश्नाला उत्तर दिलं आहे. त्यामुळे आता हा पुन्हा मिटलेला वाद पुन्हा उफाळून येणार असल्याचे दिसून येत आहे. ठाकरे गटाच्या नेत्या मनिषा कायंदे यांनी एक ट्विट केलं आहे. त्यामुळे चित्रा वाघही संतापल्या आहेत. 2020 मध्ये शरीरसौष्ठव स्पर्धेतील महिला बॉडी बिल्डरच्या गौरवप्रसंगीचा तो फोटो असून "भाजपच्या चित्रा वाघ यांना हा नंगाटनाच मान्य आहे का? असं मनिषा कायंदे यांनी म्हंटलं आहे.

त्यावर उत्तर देताना चित्रा वाघ म्हणाल्या की, "शरीरसौष्ठव स्पर्धा कळतात का तुम्हाला मनिषा कायंदे ताई ? खासदार क्रीडा महोत्सव दरवर्षी घेणारे आमचे नेते नितीनजी गडकरी पुरस्कार वितरण करीत आहेत शरीरसौष्ठव स्पर्धेचे, असो॰कायम घरात बसून केवळ चकाट्या पिटणाऱ्यांना ते कळणार तरी कसे …?" असं चित्रा वाघ म्हणाल्या आहेत.

चित्रा वाघ यांनी अभिनेत्री उर्फी जावेदच्या अंगप्रदर्शनावर प्रश्न उपस्थित केला होता. त्यावर त्यांनी माध्यमांबरोबरच त्यानी सोशल मीडियावर आपली भूमिका स्पष्ट केली होती. त्यामुळे अनेकांनी उर्फी जावेद हिच्याबरोबरच दुसऱ्या अभिनेत्रीच्या अंगप्रदर्शनावरतीही सवाल उपस्थित करून हे तुम्हाला चालतं का असा सवाल चित्रा वाघ यांना करण्यात आला आहे. आता मनिषा कायंदे यांनी ट्विटरवर त्यांना प्रश्न केला असला तरी आणि त्यांना चित्रा वाघ यांनी उत्तर दिल्यामुळे हा वाद आणखी वाढण्याची शक्यता आहे.