पंकजा मुंडेंचा 'स्वाभिमान' जागा झाला; केले नवे ट्विट

मुंबई : भाजपच्या माजी आमदार पंकजा मुंडे विधानसभा निवडणूकीत पराभूत झाल्यापासून फेसबूक आणि ट्विटरच्या माध्यमातून लोकांशी संवाद साधत आहेत. काही दिवसांपूर्वी त्यांनी फेसबूकवर पोस्ट करत पुढे काय करायचं? कोणत्या मार्गाने जायचं? याबाबत येत्या 12 डिसेंबरला म्हणजेच दिवंगत गोपीनाथ मुंडे यांच्या जन्मदिनी ठरवणार असल्याचे सांगितले होते. आता आज त्यांनी पुन्हा एक नवं ट्विट केले आहे. 

'12 डिसेंबर' रोजी सकाळी 11 वाजता आपल्या लोकनेत्याच्या स्मरणार्थ आपल्या सर्वांना 'गोपीनाथ गड' येथे आमंत्रण. तुम्ही सारे या.. हा दिवस आपला स्वाभिमान दिवस आहे आहे. तुम्ही ही या..वाट पहाते. असे ट्विट त्यांनी केले आहे. 

पंकजा मुंडे यांनी एक डिसेंबरला फेसबूक पोस्ट लिहून आधीच खळबळ निर्माण केली होती. त्यानंतर दुसऱ्याच दिवशी त्यांनी आपल्या ट्विटर अकाउंटवरुन भाजपचे नावही हटविले. आपण सर्वांनी 12 डिसेंबरला भेटू, तोपर्यंत मला वेळ हवा आहे असे त्यांनी सांगितले आहे. त्यामुळे आता 12 तारखेसा गोपीनाथ गडावर त्या काय खुलासा करतात हे पाहणे उत्सुकतेचे ठरणार आहे. औरंगाबादमध्ये झालेल्या भाजपच्या विभागीय बैठकीलाही त्या उपस्थित नव्हत्या.