‘सामाजिक मंत्रिमंडळा’च्या हाती आंध्र प्रदेशाची सत्तासूत्रे

अमरावती : आंध्र प्रदेशचे मुख्यमंत्री वाय. एस. जगन मोहन रेड्डी यांनी सोमवारी मंत्रिमंडळाची फेररचना केली. यामध्ये १३ नव्या चेहऱ्यांना संधी मिळाली असून ११ मंत्र्यांचाच पुन्हा समावेश केला आहे. नवे मंत्रिमंडळ हे सामाजिक मंत्रिमंडळ असल्याचे वर्णन पक्षाने केले आहे. इतर मागास वर्ग, अनुसूचित जाती - जमाती आणि अल्पसंख्याक समुदायाला यात ७० टक्के प्रतिनिधित्व देण्यात आले आहे.

ज्येष्ठ आमदार धर्मणा प्रसाद राव यांचाही मंत्रिमंडळात समावेश करण्यात आला आहे. ते सर्वांत वरिष्ठ मंत्री ठरले आहेत. मुख्यमंत्री रेड्डी यांनी विधान परिषदेतील एकाही आमदाराला मंत्रिपद दिले नाही. जात व समाजाच्या आधारेच नव्या मंत्र्यांची निवड झाली आहे. यात सर्वांत जास्त दहा मंत्रिपदे मागासवर्गाला मिळाली.