Solapur Lok Sabha: प्रणिती शिंदेंच्या नावे 'इतक्या' कोटींची मालमत्ता; ५ वर्षांत मालमत्तेत १.८१ कोटींची वाढ

सोलापूर: महाविकास आघाडीतर्फे काँग्रेस उमेदवार आमदार प्रणिती शिंदे यांनी गुरुवारी उमेदवारी अर्ज दाखल केला. त्यावेळी त्यांनी सादर केलेल्या प्रतिज्ञापत्रानुसार त्यांच्याकडे सध्या सहा कोटी ६० लाख ७० हजार ४०२ रुपयांची मालमत्ता आहे. २०१९च्या तुलनेत त्यांच्या संपत्तीत पाच वर्षांत एक कोटी ८१ लाख ४२ हजार १९२ रुपयांची वाढ झाल्याचे दिसून येते.

शहर मध्य विधानसभा मतदारसंघातून सलग तीनवेळा निवडून आलेल्या आमदार प्रणिती शिंदे यांच्या नावे २०१९ मध्ये चार कोटी ७९ लाख २७ हजार २१० रुपयांची मालमत्ता होती. तर २०२४ मध्ये त्यांच्या नावे सहा कोटी ६० लाख ७० हजार ४०२ रुपयांची मालमत्ता तथा संपत्ती असल्याचे त्यांनी निवडणूक निर्णय अधिकाऱ्यांना दिलेल्या प्रतिज्ञापत्रातून स्पष्ट होते.

विशेष बाब म्हणजे आपल्या नावे एकही दुचाकी, चारचाकी नसल्याचेही त्यांनी त्यात नमूद केले आहे. २०१९च्या तुलनेत त्यांची बॅंकांमधील ठेवी तथा रक्कम जवळपास ३० लाख रुपयांनी कमी झाली आहे. तसेच आमदार प्रणिती शिंदे यांच्या नावे कोणत्याही बॅंकेचे कर्ज नसल्याचे दिसून येते.

२०१९च्या तुलनेत संपत्तीत वाढ किती?

स्थावर मालमत्तेत एक कोटी ५२ हजार ५४४ रुपयांची वाढ

जंगम मालमत्तेत २९ लाख ३५ हजार ६४८ रुपयांची वाढ

जागा, जमीन व दागिन्यांमध्ये कोणतीही वाढ नाही

पाच वर्षांत दागिन्यांत कोणतीही वाढ नाही, ३०० ग्रॅम सोने जैसे थे

बॅंकांमधील ठेवीत ३० लाखांची घट

२०१९च्या तुलनेत २०२४मध्ये एक कोटी ८१ लाख ४३ हजार १९२ रुपयांनी संपत्ती वाढली

प्रणिती शिंदेंकडील संपत्ती

दागिने : ३०० ग्रॅम

जमीन : ५ एकर ७० गुंठे

शेअरमधील गुंतवणूक : जवळपास १२ लाख रु.

बॅंका व टपालमधील ठेवी : ९९.५१ लाख रुपये

वाहने व वैयक्तिक कर्ज : नाही

निवासस्थाने : दादर व सोलापूर (प्रत्येकी एक)