‘RTE’चे प्रवेश मे महिन्यातच! सर्वच शाळांची नोंदणी पूर्ण, आता पुढचा टप्पा शाळांच्या मॅपिंगचा; घरापासून 1KM अंतरावरील शाळेतच विद्यार्थ्यांना प्रवेश

सोलापूर : दरवर्षी डिसेंबर- जानेवारीत सुरू होणारी आरटीई प्रवेश प्रक्रिया मार्च संपत आला तरीदेखील सुरू झालेली नाही. आरटीई प्रवेशातील नवीन बदलानुसार सध्या खासगी अनुदानित, अशंत: अनुदानित, विनाअनुदानित, जिल्हा परिषद, महापालिका, नगरपालिकांसह खासगी इंग्रजी माध्यमांच्या शाळांची नोंदणी करून घेण्यात आली आहे. त्यानंतर आता सर्व शाळांमधील अंतर (मॅपिंग) नेमके किती आहे, याचे ऑनलाइन मोजमाप होईल. त्यानंतर प्रवेश प्रक्रियेला सुरवात होणार आहे.

२०२४-२५ या शैक्षणिक वर्षापासून ‘आरटीई’अंतर्गत इयत्ता पहिलीत प्रवेश घेणाऱ्या विद्यार्थ्यांना इंग्रजी माध्यमाच्या शाळांमध्ये २५ टक्के प्रवेश मोफत मिळणार नाहीत. आर्थिकदृष्ट्या दुर्बल, मागासवर्गीय विद्यार्थ्यांना त्यांच्या घरापासून एक किमी अंतरावरील शासकीय किंवा अनुदानित, अशंत: अनुदानित शाळांमध्ये प्रवेश घ्यावा लागणार आहे. ज्या विद्यार्थ्यांच्या घरापासून एक किमी अंतरावर शासकीय किंवा खासगी अनुदानित शाळा नाही त्या विद्यार्थ्यांना त्या परिसरातील इंग्रजी माध्यमाच्या शाळेत प्रवेश घेण्याची मुभा असणार आहे. पण, शाळांच्या मॅपिंगमुळे त्या विद्यार्थ्याच्या घरापासून एक किमी अंतरावर खरोखरच शासकीय शाळा नाहीत, याची खात्री केली जाणार आहे. सोलापूर शहर-जिल्ह्यातील १४ शाळांची नोंदणी अजून झाली नसून त्याची कार्यवाही सुरु आहे.

दरम्यान, ‘आरटीई’अंतर्गत सोलापूर जिल्ह्यातील तीन हजार ३९८ शाळांची नोंदणी पूर्ण झाली असून आता या सर्व शाळांचे मॅपिंग होईल. त्यानंतर ‘आरटीई’तून प्रवेशासाठी पात्र विद्यार्थ्यांचे अर्ज मागवून घेतले जातील. विद्यार्थ्यांना शाळांचा प्राधान्यक्रम द्यावा लागेल आणि त्यानुसार त्यांना संबंधित शाळांमध्ये प्रवेश मिळतील. प्रवेशाची प्रक्रिया सुरु होण्यासाठी आणखी किमान एक महिन्याचा अवधी लागेल, अशी सद्य:स्थिती आहे. मे महिन्यात प्रवेशाची प्रक्रिया पूर्ण होईल, असे वरिष्ठ अधिकाऱ्यांनी सांगितले.

तालुकानिहाय शाळांची संख्या

तालुका शाळा

• करमाळा २६५

• मंगळवेढा २०७

• मोहोळ २६६

• द.सोलापूर २०८

• माळशिरस ४५५

• पंढरपूर ४१४

• माढा ३३९

• उत्तर सोलापूर १४७

• अक्कलकोट २८९

• बार्शी २५०

• सांगोला ४१४

• सोलापूर शहर १४४

• एकूण ३३९८

नोंदणी झाली, आता शाळांचे मॅपिंग आणि मग प्रवेश

‘आरटीई’ प्रवेशाच्या अनुषंगाने जिल्ह्यातील सर्वच शाळांची नोंदणी पूर्ण झाली आहे. आता त्या शाळांचे शासन स्तरावरून मॅपिंग होईल. त्यानंतर काही दिवसांत ‘आरटीई’अंतर्गत प्रवेशासाठी पात्र विद्यार्थ्यांचे प्रवेश सुरू होतील. पण, प्रवेशासंदर्भात अद्याप वरिष्ठ स्तरावरून काही माहिती मिळालेली नाही.

- कादर शेख, प्राथमिक शिक्षणाधिकारी, जिल्हा परिषद, सोलापूर