Film Festival : सकाळ प्रीमियर चित्रपट पुरस्कार सोहळा रंगणार २०२४ मध्ये

मुंबई - मनोरंजन क्षेत्रातील मानाचा व प्रतिष्ठेचा समजला जाणारा, तसेच कलाकार आणि तंत्रज्ञांच्या कलागुणांना प्रोत्साहन देणारा ‘सकाळ प्रीमियर चित्रपट पुरस्कार सोहळा’ आता नवीन वर्षात अर्थात २०२४ मध्ये होणार आहे.

हिंदी व मराठी चित्रपटसृष्टीतील तारे-तारेकांच्या उपस्थितीत होणाऱ्या या सोहळ्यामध्ये मनोरंजनाची उत्तम मेजवानी असणार आहेच; शिवाय चित्रपटसृष्टीत उल्लेखनीय कामगिरी करणारे कलाकार आणि तंत्रज्ञांचा गौरव करण्यात येणार आहे. त्याबाबतची तारीख, ठिकाण व वेळ लवकरच जाहीर करण्यात येईल.

पी. एन. गाडगीळ ज्वेलर्स लि. या सोहळ्याचे मुख्य प्रायोजक आहेत. या सोहळ्याचे हे चौथे वर्ष आहे. पहिला सोहळा प्रभादेवी येथील रवींद्र नाट्यमंदिरात २०१७ मध्ये पार पडला होता. त्यानंतर दुसरा सोहळा पुण्यातील ॲमनोरा-हडपसर येथे २०१९ मध्ये पार पडला आणि तिसरा सोहळा ठाण्यातील डॉ. काशिनाथ घाणेकर नाट्यगृहात झाला होता. या वेळी हिंदी व मराठी चित्रपटसृष्टीतील कलाकार व तंत्रज्ञ मंडळींबरोबरच राजकीय व सामाजिक क्षेत्रातील अनेक मान्यवर मंडळी उपस्थित होती.

मराठी चित्रपटसृष्टीतील प्रथितयश आणि उदयोन्मुख कलाकारांचे विविध नृत्याविष्कार, विनोदाची उत्तम व खुसखुशीत मेजवानी आणि खुमासदार सूत्रसंचालन अशा उत्साहवर्धक वातावरणात हा सोहळा पार पडला होता. आताही हा सोहळा मोठ्या जल्लोषात आणि उत्साहात पार पडणार आहे. सर्वोत्कृष्ट चित्रपट, सर्वोत्कृष्ट अभिनेता आणि अभिनेत्री अशा विविध विभागांतील पुरस्कार या सोहळ्यात दिले जाणार आहेत.

मनोरंजन क्षेत्रात उत्तम काम करणाऱ्यांचा हा गौरव सोहळा आहे. आतापर्यंत या सोहळ्यामध्ये मराठीतील अनेक कलाकार आणि तंत्रज्ञांनी उपस्थिती लावली आहे. त्याचबरोबर हिंदीतील कलाकारांनीही या सोहळ्याचे कौतुक केले आहे. पुढील वर्षीही हा सोहळा अशाच रंगतदार वातावरणात पार पडणार आहे.

या सोहळ्याला हिंदीतील कलाकारांबरोबरच मराठी मनोरंजन क्षेत्रातील अनेक कलाकार आणि तंत्रज्ञ उपस्थिती राहणार आहे. याबाबतची सविस्तर माहिती लवकरच जाहीर करण्यात येईल.