निधीअभावी अर्ध्या लाख शिक्षकांच्या पगारी लांबणीवर! आश्वासित सेवा योजनेमुळे पगारीत पुन्हा वाढ; टीईटी नसलेल्या अनुकंपावरील शिक्षकांसाठी ‘हा’ आदेश

तात्या लांडगे

सोलापूर : राज्यातील अंशत: अनुदानित सहा हजार ७५ शाळा व नऊ हजार ६३१ तुकड्यांवर सद्य:स्थितीत ५२ हजारांहून अधिक शिक्षक व शिक्षकेतर कर्मचारी कार्यरत आहेत. त्यांच्या वेतनासाठी दरमहा साधारणत: ९५० कोटी रुपये लागतात. या शिक्षकांची वाढीव टप्पा देण्याची मागणी शासनाने मान्य केली आहे; पण या शिक्षकांच्या पगारी करायला पुरेशा प्रमाणात निधीच नसल्याची बाब समोर आली आहे. त्यामुळे निधी येईल तशा टप्प्या- टप्प्याने त्यांच्या पगारी होत आहेत.

राज्यातील अंशत: अनुदानित शाळांवरील शिक्षक- शिक्षकेतर कर्मचाऱ्यांसाठी सर्वाधिक साडेचार कोटींचा निधी एकट्या सोलापूर जिल्ह्यासाठी दरमहा लागतो. पण, दरमहा दोन-अडीच कोटी रुपयेच प्राप्त होतात. आता ५ ऑगस्ट रोजी शालेय शिक्षण विभागाचे वार्षिक बजेट असून मागील चार महिन्यांतील खर्च आणि पुढील आठ महिन्यांसाठी लागणाऱ्या अपेक्षित निधीची जिल्हानिहाय मागणी वित्त विभागाला कळविली जाणार आहे.

त्यात १ ऑगस्टपासून अंशत: अनुदानित शाळांना दिल्या जाणाऱ्या वाढीव २० टक्के अनुदानासह मान्यताप्राप्त अनुदानित सर्व शाळांवरील शिक्षकांच्या वाढणाऱ्या पगारीचीही रक्कम कळविली जाणार आहे. त्यामुळे गतवर्षीच्या तुलनेत शालेय शिक्षण विभागाचा वेतनावरील खर्च दरमहा किमान दीड हजार कोटींनी वाढणार आहे. त्यामुळे पगारी वेळेत होणार, की पुन्हा निधी कमी पडणार, याकडे सर्वांचे लक्ष लागले आहे.

अनुकंपावरील ‘या’ शिक्षकांची सेवा समाप्ती

अनुकंपा तत्त्वावरील जे शिक्षक ‘टीईटी’ (शिक्षक पात्रता परीक्षा) उत्तीर्ण नाहीत त्यांना आता १ सप्टेंबर २०२९ पर्यंत मुदत देण्यात आली आहे. ३१ जुलैच्या शालेय शिक्षण विभागाच्या निर्णयानुसार २ सप्टेंबर २०२४ रोजी किंवा त्यापूर्वी तीन वर्षे शिक्षण सेवक कालावधी पूर्ण झालेल्यांना नियमित करण्यात येणार आहे. मात्र, ते शिक्षक मुदतीत टीईटी उत्तीर्ण न झाल्यास त्यांची सेवा समाप्त केली जाणार आहे. दुसरीकडे, २ सप्टेंबर २०२४ नंतर तीन वर्षांचा शिक्षण सेवक कालावधी पूर्ण केला आहे, अशा टीईटी उत्तीर्ण नसलेल्या शिक्षकांचा शिक्षण सेवक कालावधी सप्टेंबर २०२९ पर्यंत वाढविण्याचेही आदेश आहेत. म्हणजेच, त्या शिक्षकांना ७ वर्षे शिक्षण सेवक म्हणून काम करावे लागणार आहे.

निधी प्राप्त होईल, काही दिवस विलंब होतो पण वेतन मिळतेच

नगरपालिका व टप्पा अनुदानाच्या शाळांवरील शिक्षकांच्या पगारीसाठी जेवढा शिल्लक निधी होता, तेवढ्या शाळांची बिले पाठविली आहेत. उर्वरित शाळांवरील शिक्षकांच्या पगारीसाठी निधीची मागणी केली असून, तो प्राप्त झाल्यावर त्यांचे वेतन होईल.

- दीपक मुंडे, वेतन अधीक्षक, सोलापूर

टप्पा अनुदानाच्या शाळांची स्थिती

• एकूण शाळा

• ६,०७५

• वाढीव एकूण तुकड्या

• ९,६३१

• शिक्षक-शिक्षकेतर कर्मचारी

• ५२,२७६

• दरमहा पगारीसाठी निधी

• ९७०.४२ कोटी