Sanjay Shirsath : 'परळीत कुणाची धिंड काढली होती? जास्त बोलायला लावू नका!' शिरसाटांचा अंधारेंना इशारा

Sanjay Shirsath press conference alligation : आमदार संजय शिरसाट यांनी शिवसेनेच्या उपनेत्या सुषमा अंधारे यांच्यावर केलेल्या टीकेनंतर वेगळ्याच चर्चेला उधाण आले आहे. दोन दिवसांपासून राजकीय क्षेत्रामध्ये मोठी खळबळ उडाल्याचे दिसून आले आहे. दुसरीकडे शिरसाट यांच्यावर सोशल मीडियावर होणाऱ्या टीकेमुळे त्यांनी घेतलेल्या पत्रकार परिषदेमध्ये आपल्या वाटेला गेल्यास जशास तसे उत्तर देणार असल्याचे म्हटले आहे.

आमदार संजय शिरसाट यांच्या पत्रकार परिषदेमध्ये त्यांनी अंधारे यांच्यावर टीकास्त्र सोडले आहे. अंधारे यांनी दुसऱ्यांवर बोलताना आपण काय शब्द वापरतो, आपली भाषा काय असते याचा विचार करावा, मला बोलल्यास मी काही शांत बसणार नाही. त्यांना त्यांचेच भाषेत उत्तर दिल्याशिवाय राहणार नाही.असेही शिरसाट यांनी म्हटले आहे. दुसरीकडे अंधारे यांनी पोलिसांकडे आणि राज्य महिला आयोगाकडे तक्रार केली आहे.

Also Read - जीएसटीसाठी नोंदणी केलीच नाही तर??

त्याचे झाले असे की, छत्रपती संभाजी नगर येथील आमदार संजय शिरसाट यांनी दोन दिवसांपूर्वी शिवसेनेच्या उपनेते सुषमा अंधारे यांच्यांवर अर्वाच्च भाषेत टीका केली होती. यावरुन मोठा गदारोळ झाल्याचे दिसून आले आहे. सुषमा अंधारे यांनी शिरसाट यांच्या विरोधात महिला आयोगात तक्रार दाखल केल्यानं शिरसाट यांनी पत्रकार परिषेदतून अंधारे यांना चांगलेच सुनावले आहे.

पत्रकार परिषदेमध्ये शिरसाट म्हणाले, आम्हाला जास्त काही बोलायला लावू नका. तुम्ही जे शब्द वापरता ते योग्य आहेत का, वरातीतला घोडा असे शब्द वापरणे हे एका महिलेला शोभते का, तुम्ही आतापर्यत प्रत्येक ठिकाणी जी भाषा केली आहे ती चुकीची आहे. आम्हाला बोलायला लावू नका. परळीमध्ये कुणाची धिंड काढण्यात आली होती हे सगळ्यांना माहिती आहे. तेव्हा माझ्याशी वाद घालू नका नाहीतर मी जशास तसे उत्तर दिल्याशिवाय राहणार नाही.असेही शिरसाट यांनी म्हटले आहे.