Sharad Pawar : गोविंदबागेत शिंदे-फडणवीस? शरद पवार यांचे मुख्यमंत्री व दोन्ही उपमुख्यमंत्र्यांना भोजनाचे निमंत्रण....

बारामती: ज्येष्ठ नेते शरद पवार यांनी मुख्यमंत्री एकनाथ शिंदे व उपमुख्यमंत्री देवेंद्र फडणवीस व अजित पवार यांना बारामती दौ-यात भोजनाचे निमंत्रण दिले आहे. नमो रोजगार मेळाव्याच्या निमित्ताने मुख्यमंत्री व दोन्ही उपमुख्यमंत्री शनिवारी (ता. 2) बारामतीच्या दौ-यावर आहेत. या दौ-यामध्ये त्यांनी गोविंदबाग या निवासस्थानी मंत्रीमंडळातील सहका-यांसह भोजनास येण्याचे आमंत्रण दिले आहे.

या पत्रात शरद पवार यांनी नमूद केले आहे की, आपण शनिवार 2 मार्च रोजी बारामती येथे शासकीय दौऱ्यानिमित्त येत असल्याचे समजले. सदर शासकीय कार्यक्रमांप्रसंगी संसद सदस्य नात्याने मला आणि सुप्रिया सुळे यांना उपस्थित राहायला आवडेल.

तसेच उक्त दिनी महारोजगार मेळाव्याचे आयोजन मी संस्थापक अध्यक्ष असलेल्या विद्या प्रतिष्ठान, विद्यानगरी, बारामती येथील मैदानात करण्यात येत असल्याने संस्थेचा अध्यक्ष या नात्याने मी आपले संस्थेच्या प्रांगणात यथोचित स्वागत करू इच्छितो. करीता विद्या प्रतिष्ठान, विद्यानगरी, बारामती येथील अतिथी निवासात चहापानासाठी आपणास निमंत्रीत करतो.

आपण मुख्यमंत्री पदी विराजमान झाल्यानंतर बारामती शहरी प्रथमतः येत आहात याचा मला मनोमन आनंद आहे. बारामती येथील 'गोविंदबाग' ह्या माझ्या निवासस्थानी अतिथ्य भोजनाचा आस्वाद घ्यावा, असे मी आपणास दूरध्वनीवरून निमंत्रण यापूर्वीच दिले आहे. कृपया नमो महारोजगार मेळाव्यानंतर आपण मंत्रीमंडळातील इतर सहकाऱ्यांसह ह्या निमंत्रणाचा देखील आपण स्विकार करावा, असं पवारांनी पत्रामध्ये म्हटलं आहे.