Jitendra Awhad : शरद पवार नावाचे मनगट आमच्याकडे; जितेंद्र आव्हाड यांचा अजित पवार गटाला टोला

ठाणे - मुळात हा पक्षच शरद पवार यांचा आहे. हे आता नियतीने ही दाखवून दिले. असे आमदार आव्हाड म्हणाले. आमच्यकडून त्यांनी घड्याळ चोरले पण मनगट आमच्याकडे राहिले असा टोला राष्ट्रवादी काँग्रेसचे (शरद पवार) आमदार जितेंद्र आव्हाड यांनी अजित पवार गटाला लगावला.

बुधवारी रात्री आव्हाड यांनी ठाण्यात पत्रकारांशी संवाद साधला. तसेच यावेळी आमदार आव्हाड यांनी शरद पवार यांचा फोटो असलेले नवीन पक्षाचे पोस्टर ही जाहीर केले. यावेळी बोलतांना, दम असेल तर आता त्यांनी राष्ट्रवादी काँग्रेस पक्ष अजित पवार असे नाव लावावे, असे आव्हान जितेंद्र आव्हाड यांनी दिले. निवडणूक आयोगाचा निर्णय हा दुट्टपी आणि संभ्रम निर्माण करणारा आहे.

निवडणूक आयोग खोटे बोलत असून विरोधाभास दर्शवत असल्याचा आरोपही आव्हाड यांनी यावेळी केला. शरद पवार यांना राजकीयदुष्टया संपविण्याचा कट रचनारे अजित पवार असल्याचा गंभीर आरोपही आव्हाड यांनी यावेळी केला. तुम्ही पाकीटमारासारखे घड्याळ चोरले आहे. पण मनगट तोडायला विसरले. ते मनगट शरद पवार यांचे आहे. ते नव्या जोमाने उभे राहतील.

सावली देणाऱ्या वटवृक्षावर यांनी घाव घातला. यात सगळ्यांचा हातभार लागला आहे. हे शरद पवार यांचा राजकीयदुष्टया गळा घोटायला निघाले. पण नियती त्यांना येत्या काळात दाखवून देईल. की शरद पवार काय आहे. आजही सच्चे कार्यकर्ते अजून जिवंत आहे. एकीकडे ठाकरेचे घर उध्वस्त करायचे दुसरीकडे पवार यांना शरण आणण्याचा प्रयत्न करायचा. पण शरद पवार हे बहुआयामी व्यक्तिमत्व असून ते डगमगणार नाहीत. ८४ व्या वर्षी शरद पवार यांना जे छळतात त्यांचा बदला जनता घेईल. हम लडेंगे और जितेंगे भी! असा निर्धार जितेंद्र आव्हाड यांनी व्यक्त केला.