Shivsena : हे नवं चिन्हच शिवसेनेत नवी क्रांती घडवेल; संजय राऊतांची पहिली प्रतिक्रिया

एकनाथ शिंदे आणि उद्धव ठाकरे यांच्या वादामध्ये अखेर निवडणूक आयोगाने शिवसेनेचं पक्षचिन्ह आणि पक्षाचं नावही गोठवलं आहे. यावरुन दोन्ही गटांमधून प्रतिक्रिया येत असून पुढील कायदेशीर बाबींची पूर्तताही करण्यात येत आहे. या सगळ्या गोंधळावर राज्यातल्या अनेक प्रमुख नेत्यांनी भाष्य केलं आहे. शिवसेनेचे खासदार आणि सध्या कोठडीमध्ये असलेले संजय राऊत यांनीही इशाऱ्यानेच प्रतिक्रिया दिली आहे.

आज संजय राऊत यांच्या जामीन अर्जावर सुनावणी होत आहे. त्यासाठी पोलीस राऊतांना न्यायालयाकडे घेऊन जात होते. त्यावेळी जाता जाता माध्यमांनी त्यांना चिन्ह गोठवण्यात आल्याविषयी प्रतिक्रिया देण्याचा आग्रह केला. त्यावेळी त्यांनी मान हलवून त्यावर प्रतिक्रिया देण्यास नकार दिला. पुढे तुम्ही कारागृहात जाताना महाराष्ट्र कमजोर होतोय, असं म्हणाला होता, त्याविषयी विचारलं असता त्यांनी मान हलवून होकार देत आपण खरंच बोललोय, असा इशाराही त्यांनी हाताने केला.

राऊतांना न्यायालयात नेताना आजूबाजूला शिवसैनिकांनी मोठ्या प्रमाणावर गर्दी केली होती. त्यानंतर शिवसैनिकांनी त्यांनी चिन्हं गोठवल्याविषयी विचारलं असता राऊतांनी उत्तर दिल्याचं सामच्या सूत्रांनी सांगितलं आहे. राऊत म्हणाले, "चिन्ह गेल्याची ही पहिली वेळ नाही. काँग्रेसमध्ये इंदिरा गांधीही अशाच परिस्थितीतून पुढे गेल्या होत्या. तीनवेळा त्यांचे चिन्ह बदललं होतं. जनसंघालाही या परिस्थितीचा सामना करावा लागला. हे काही नवीन नाही. हे नवं चिन्हच शिवसेनेसाठी क्रांती घडवेल. नावात काय आहे? खरी शिवसेना कुणाची हे सगळ्यांना माहित आहे."