Rahul Gandhi : सर्व काही अलबेल, चिंता नसावी - संजय राऊत

काँग्रेस नेते राहुल गांधी यांच्यावर कारवाई करत लोकसभेने त्यांची खासदारकी रद्द केली आहे. या कारवाईनंतर झालेल्या पत्रकार परिषदेत राहुल गांधींनी सावरकरांचा उल्लेख केला आणि राज्यासह देशातलं राजकीय वातावरण चांगलंच तापलं आहे.

महाविकास आघाडीमध्ये काँग्रेसचा मित्र पक्ष असलेल्या ठाकरे गटाने राहुल गांधी यांना सावरकरांबद्दलच्या विधानावरुन चांगलंच सुनावलं होतं. त्यामुळे आता महाविकास आघाडीत वादाची ठिणगी पडल्याचं चित्र दिसून येत होतं. त्यानंतर खासदार संजय राऊत यांनी राहुल गांधी आणि सोनिया गांधी यांची भेट घेतली.

या भेटीनंतर संजय राऊत यांनी आपल्यात सकारात्मक चर्चा झाल्याचे संकेत दिले आहेत. याविषयी संजय राऊत यांनी ट्वीट केलं आहे. ट्वीटमध्ये राऊत म्हणाले,"श्रीमती सोनिया गांधी आणि श्री राहुल गांधी यांची आज भेट झाली.अनेक महत्वाच्या विषयांवर सविस्तर चर्चा झाली. सर्व काही आलबेल आहे. चिंता नसावी."