Shivsena: "गजाभाऊ...तुम्ही फक्त अर्ज भरणार अन् मुलाला बिनविरोध निवडून आणणार, खंजीर खुपसू नका"; रामदास कदम यांचा गंभीर आरोप!

Shivsena: मुंबईतील उत्तर पश्चिम लोकसभा मतदार संघावरून शिवसेनेचे नेते (शिंदे गट) गजानन कीर्तिकर आणि रामदास कदम यांच्यात आता जुंपली आहे. कीर्तिकर हे पक्षाशी गद्दारी करीत आहेत, असा संशय व्यक्त करीत कदम यांनी त्यांच्यावर हल्ला चढविला आहे.

मुंबई उत्तर - पश्चिम लोकसभा मतदार संघासाठी ठाकरे गटाकडून अमोल कीर्तिकर यांच्या उमेदवारीची चर्चा आहे, तर गजानन कीर्तिकर हे देखील शिंदे गटाकडून उमेदवारी मागत आहेत. त्यामुळे रामदास कदम यांनी त्यांच्या उमेदवारीला आक्षेप घेतला आहे. कीर्तिकर लढणार नसतील तर लोकसभेची जागा पुत्र सिद्धेश कदम यांच्यासाठी सोडावी, अशी मागणी कदम यांनी यापूर्वीच पक्षाकडे केली आहे. यावर आपण लोकसभेची निवडणूक लढणार असल्याचे कीर्तिकर यांनी स्पष्ट केले होते.

कीर्तिकर पिता पुत्र हे प्रतिस्पर्धी पक्षात असूनही एकाच कार्यालयात बसून काम करतात, हे सगळे जग पाहत आहे. त्यामुळे दोन पक्षांतून एकाच घरातील सदस्यांना उमेदवारी कशी द्यायची, असा सवाल कदम यांनी केला आहे. ‘गजाभाऊ तुम्ही निवडणुकीला जरूर उभे राहा. तुमचा मुलगाही तुमच्याच मतदारसंघात उभा राहणार आहे. त्यामुळे उभे राहिल्यानंतर खरोखर लढा. फक्त अर्ज भरून घरात बसू नका," अशा शब्दात कदम यांनी कीर्तिकर यांचा समाचार घेतला आहे.

तुम्ही फक्त अर्ज भरणार आणि मुलाला बिनविरोध निवडून आणण्याची खेळी करू नका. पक्षाच्या पाठीत खंजीर खुपसू नका एवढीच तुम्हाला विनंती आहे.

रामदास कदम, शिवसेनेचे नेते (शिंदे गट)