दसरा मेळाव्यात शिंदे पुत्राला मिळणार मोठी जबाबदारी? आदित्य ठाकरेंना थेट आव्हान

मुंबई - राजकीय उलथापालथ घडवत शिवसेनेचे ज्येष्ठ नेते एकनाथ शिंदे यांनी राज्यात सत्तांतर घडवलं. त्यामुळे शिवसेना पक्षप्रमुख उद्धव ठाकरे यांना मुख्यमंत्रीपदावरून पायउतार व्हावे लागले. शिंदे यांनी भाजपसोबत घरोबा करून मुख्यमंत्रीपद मिळवलं. तेव्हापासून शिवसेना आणि एकनाथ शिंदे गटात कमालीचा संघर्ष सुरू झाला आहे. हा संघर्ष कोर्टात असताना दसरा मेळाव्यावरून देखील दोन्ही पक्ष आमने-सामने आले होते. त्यामुळे दोन्ही गटांच्या दसरा मेळाव्याला महत्त्व प्राप्त झालं आहे. त्यातच या दसऱ्या मेळाव्यात एकनाथ शिंदे यांचे पुत्र श्रीकांत शिंदेंना मोठी जबाबदारी मिळण्याची शक्यता व्यक्त होत आहे. (Shrikant Shinde news in Marathi)

४० आमदार घेऊन बाजूला निघालेले एकनाथ शिंदे आपल्या गटालाच खरी शिवसेना मानतात. त्यातच अनेक खासदारांनी शिंदे गटात प्रवेश केला आहे. त्यामुळे मुळ शिवसेना कमकुवत झाली आहे. त्यामुळे ठाकरेंच्या शिवसेनेचे संघटन मजबूत करण्यासाठी युवासेना प्रमुख आदित्य ठाकरे पूर्वीपेक्षा अधिक सक्रीय झाले आहेत. त्याचवेळी एकनाथ शिंदे गटाकडून देखील युवासेना मजबूत करण्यासाठी हालचाली सुरू आहे. याचे संकेत एका खासदाराने केलेल्या मागणीमुळे मिळाले होते. त्यामुळे श्रीकांत शिंदें यांच्याकडे युवासेना प्रमुखपदाची मोठी जबाबदारी जाण्याची शक्यता व्यक्त होत आहे.

शिंदे गटातील खासदार प्रताप जाधव यांनी काही दिवसांपूर्वी अशी मागणी केली होती. मुख्यमंत्र्यांच्या निवासस्थानी झालेल्या बैठकीत त्यांनी श्रीकांत शिंदे यांच्याकडे युवासेना प्रमुखपदाची जबाबदारी देण्याची मागणी केली होती.

दरम्यान दिवंगत शिवसेनाप्रमुख बाळासाहेब ठाकरे यांच्या उपस्थितीत दसरा मेळाव्यातच आदित्य ठाकरे यांची युवासेना प्रमुखपदी नियुक्ती करण्यात आली होती. यंदा शिवसेनेचे दोन्ही गट दसरा मेळावा घेणार आहे. त्यामुळे दसरा मेळाव्याकडे सर्वांचे लक्ष लागले असून शिंदे गटाच्या दसरा मेळाव्यातच श्रीकांत शिंदे यांच्याकडे युवासेना प्रमुखपदाची जबाबदारी देण्यात येते का? हे पाहणे उत्सुकतेचं ठरणार आहे.