चिंताजनक! राज्यात दीड लाखांहून अधिक अॅक्टिव्ह रुग्ण, दिवसभरात रुग्णसंख्या २३ हजारांपार 

राज्यात कोरोनाची दुसरी लाट येण्याची स्थिती निर्माण झाली असून गेल्या काही दिवसांमध्ये बाधित रुग्णांच्या संख्येत झपाट्याने वाढ होत आहे. आज दिवसभरात राज्यात २३,१७९ रुग्ण आढळून आले आहेत. तर राज्यातील अॅक्टिव्ह रुग्णांची संख्या दीड लाखाच्या पार गेली आहे. आरोग्य मंत्री राजेश टोपे यांनी ही माहिती दिली आहे.

आरोग्य मंत्र्यांच्या माहितीनुसार, राज्यात आज २३,१७९ कोरोना बाधीत रुग्णांची वाढ झाली आहे तर नवे ९,१३८ कोरोनाबाधित रुग्ण बरे झाले आहेत. तसेच एकूण २१,६३,३९१ रुग्ण बरे होऊन दवाखान्यातून घरी पाठविण्यात आले आहेत. दरम्यान, राज्यात एकूण १,५२,७६० अॅक्टिव्ह रुग्ण आहेत. राज्यातील रुग्ण बरे होण्याचं प्रमाण आता  ९१.२६ टक्के झालं आहे.

कोरोनाच्या दुसऱ्या लाटेला लवकरात लवकर रोखायला हवं - PM मोदी

दरम्यान, केंद्र सरकारने बुधवारी सांगितले की, १ मार्चपासून आत्तापर्यंत पंधरा दिवसांत देशभरात १६ राज्यांमधील ७० जिल्ह्यांमध्ये १५० टक्क्यांनी संसर्गाचे प्रमाण वाढले आहे. तर उर्वरित १७ राज्यांमधील ५५ जिल्ह्यांमध्ये १०० ते १५० टक्क्यांनी रुग्णसंख्येत वाढ झाली आहे. केंद्रीय आरोग्य सचिव राजेश भूषण यांनी पत्रकार परिषेदत म्हणाले, ज्या बहुतेक राज्यांमध्ये आणि जिल्ह्यांमध्ये रुग्ण संख्या वाढण्याचा ट्रेन्ड आहे तो भाग मध्य भारत आणि पश्चिम भारताचा भाग आहे. 

आपल्या प्रेझेंटेशनदरम्यान आरोग्य सचिव म्हणाले, "सप्टेंबर २०२० मध्ये देशात सर्वाधिक ९७,८९४ रुग्ण आढळून आले होते. त्यानंतर फेब्रुवारी २०२१ पर्यंत ही संख्या सातत्याने कमी होत गेली. यानंतर आता पुन्हा ही संख्या वाढत असल्याचा ट्रेन्ड आहे."

राज्यात लसीकरणाचा उच्चांक

मुंबईत दिवसभरात ४,८११ कोरोना बाधित रुग्ण आढळले आहेत. त्याचबरोबर राज्यात मंगळवारी लसीकरणाचा विक्रम झाला असून २,६४,८९७ लोकांना कोरोना प्रतिबंधक लस देण्यात आली. जानेवारीत सुरु झालेल्या या मोहिमेंतर्गत एकाच दिवसांत लस दिलेल्यांची ही सर्वाधिक संख्या असल्याचे लसीकरण मोहिमेतील अधिकाऱ्यांनी सांगितले.