मोठी बातमी! २८ जूनला ‘टीईटी’, राज्यातील सव्वादोन लाख शिक्षक देणार परीक्षा; उत्तीर्ण होण्यासाठी ५५ ते ६० टक्के गुणांची अट, वाचा...

तात्या लांडगे

सोलापूर : सर्वोच्च न्यायालयाच्या आदेशानुसार शिक्षकांना (सेवानिवृत्तीला पाच वर्षे कमी असलेले वगळून सगळेच) ऑगस्ट २०२८ पर्यंत शिक्षक पात्रता परीक्षा (टीईटी) उत्तीर्ण व्हावी लागणार आहे. या पार्श्वभूमीवर २८ जूनला होणाऱ्या ‘टीईटी’साठी राज्यातील दोन लाख २६ हजार ४६३ शिक्षकांनी अर्ज केल्याची बाब समोर आली आहे. ‘टीईटी’च्या पेपर एक व पेपर दोनसाठी नोकरीतील शिक्षकांचे एकूण तीन लाख ४६ हजार अर्ज आहेत.

इयत्ता पहिली ते पाचवीच्या वर्गांवरील शिक्षकांना ‘टीईटी’चा पेपर-एक, तर सहावी ते आठवीच्या वर्गांवरील शिक्षकांना पेपर-दोन द्यावा लागतो. काही शिक्षक तिसरी- चौथीपासून सहावी- सातवीच्या वर्गांवर नियुक्त आहेत. त्यामुळे अशा शिक्षकांना दोन्ही पेपर उत्तीर्ण व्हावे लागणार आहे. त्यामुळे त्यांनी दोन्ही पेपरसाठी अर्ज केले आहेत.

‘टीईटी’ उत्तीर्ण होण्यासाठी खुल्या प्रवर्गातील उमेदवारांना एकूण गुणांपैकी ६० टक्के गुण मिळवावे लागणार आहेत. तर मागासवर्गातील उमेदवारांसाठी ५५ टक्के आणि माजी सैनिक, सैनिकांच्या विधवा पत्नींना उत्तीर्ण होण्यासाठी ४५ टक्के गुणांची अट आहे. सर्वोच्च न्यायालयाने दिलेल्या मुदतीपर्यंत शिक्षकांना परीक्षेच्या एकूण १० संधी मिळणार आहेत. सर्वोच्च न्यायालयाच्या मुदतीत पात्रता परीक्षा उत्तीर्ण नसलेल्या शिक्षकांवर सक्तीच्या सेवानिवृत्तीची कारवाई होणार आहे. त्यामुळे ५०, ५२, ५३ वयाचे शिक्षक देखील आता परीक्षेचा अभ्यास करीत आहेत.

प्रत्येक वर्गखोलीत असणार सीसीटीव्ही

शिक्षक पात्रता परीक्षेची (टीईटी) संपूर्ण तयारी झाली आहे. यंदा ‘टीईटी’साठी सुमारे सहा लाख अर्ज प्राप्त झाले असून १७२९ केंद्रांवर त्यांची २८ जूनला परीक्षा पार पडणार आहे. परीक्षेसाठी साडेचौदा हजार वर्गखोल्या असून, प्रत्येक ठिकाणी सीसीटीव्ही कॅमेरा असणार आहे.

- डॉ. नंदकुमार बेडसे, अध्यक्ष, महाराष्ट्र राज्य परीक्षा परिषद

शिक्षकांना ‘टीईटी’साठी वरिष्ठांच्या परवानगीचे बंधन नाही

नोकरीतील शिक्षकांना यापूर्वी ‘टीईटी’ देण्यापूर्वी वरिष्ठ कार्यालयाची मान्यता घेणे बंधनकारक होते. मात्र, नियुक्त शिक्षक पात्रतेची परीक्षा देत असल्याने त्यांना आता वरिष्ठ कार्यालयाच्या परवानगीची आवश्यकता नाही, अशी माहिती प्राथमिक शिक्षणाधिकारी कादर शेख यांनी दिली. जिल्ह्यातील २८ हजार उमेदवारांनी २८ जूनच्या ‘टीईटी’साठी अर्ज केले आहेत, असेही त्यांनी सांगितले.