Karnataka Election: 'राहुल गांधी सर्वांचे बाप...', सुषमा अंधारेंनी चोळलं भाजपच्या जखमेवर मिठ

कर्नाटक निवडणुकीत काँग्रेसला स्पष्ट बहुमत मिळत असल्याचे दिसून येत आहे. आतापर्यंत हाती आलेले कल पाहता काँग्रेसला 118 जागांवर आघाडी मिळाली आहे. यानंतर काँग्रेस आणि भाजप यांच्याकडून हालचाली सुरू झाल्या आहेत. अशातच ठाकरे गटाच्या उपनेत्या सुषमा अंधारे यांनी भाजपवर सडकून टीका केली आहे. तर काँग्रेस नेते राहुल गांधींचे कौतुक केलं आहे. सुषमा अंधारे यांनी भाजपवर टीका करताना थेट पंतप्रधान नरेंद्र मोदींवर निशाणा साधला आहे.

कर्नाटक निवडणुकीत भाजपच्या प्रचारासाठी पंतप्रधान मोदी मैदानात उतरले होते. नरेंद्र मोदी यांनी 19 सभा रोड शो केले होते. त्याचबरोबर अनेक केंद्रीय मंत्री यांच्यासह महाराष्ट्रातील अनेक दिग्गज नेते कर्नाटकात प्रचारासाठी आले होते. मात्र भाजपला अपेक्षित यश मिळताना दिसत नाही. या पार्श्वभूमीवर सुषमा अंधारे यांनी भाष्य केलं आहे.

सुषमा अंधारे बोलताना म्हणाल्या की, 'महाविकास आघाडीसाठी शुभ संकेत आहे. कर्नाटकचे निकाल हे एकूणच 'मोदी है तो मुनकीन है' असे म्हणणाऱ्या सगळ्या भक्तजनांसाठी ही चपराक आहे. पण असं म्हटल्यावर ज्यांची उमेद जात होती त्या सर्वांसाठी हा ऊर्जादायी निकाल आहे. पंतप्रधान मोदी यांनी प्रचंड नकारात्मक राजकारण अन् ऊर्जा निर्माण केली होती. त्याला सगळे कंटाळले आहेत. कर्नाटक मधील निकालाची विजयाची ऊर्जा हे महाराष्ट्रात दिसेल असा विश्वास सुषमा अंधारे यांनी व्यक्त केला आहे.

तर पुढे त्या म्हणाल्या की, राहुल गांधींच्या भारत जोडो यात्रेचा परिणाम कर्नाटकात दिसणार नाही असं म्हटलं जात होतं. ज्या राहुल गांधींना भाजपच्या स्लीपर सेल ने पप्पू म्हणून हिणवलं ते राहुल गांधी हे सर्वांचे बाप निघाले. राहुल गांधी यांची इमेज खराब करण्याचा प्रयत्न केला. राहुल गांधीच काय तर नेहरू गांधी यांना देखील बदनाम करण्याचा प्रयत्न केला. 'पप्पू पास नही हो गया पप्पू मेरिट मे आ गया', असंही अंधारे म्हणाल्या आहेत.