महानिर्मितीचा चौथा संच लवकरच कार्यन्वित होणार; राज्याच्या क्षमतेत पडणार ६६० मेगावॅटची भर

मुंबई : महानिर्मितीच्या भुसावळ ६६० मेगावॅट संच क्रमांक ६चे अभियांत्रिकी, खरेदी आणि उभारणीचे काम युद्धपातळीवर सुरु आहे. हा संच ऑक्टोबर महिन्यापर्यंत कार्यन्वित करण्याची योजना महानिर्मितीच्या आखली आहे. हा संच कार्यन्वित होताच राज्याच्या निर्धारित वीज निर्मिती क्षमतेत ६६० मेगावॅटची भर पडेल,अशी माहिती महानिर्मितीने दिली आहे.

महानिर्मितीच्या भुसावळ संचाचे बाष्पक प्रदीपन ३० मार्च रोजी संपन्न झाले. त्यानंतर सर्व तांत्रिक बाबींची पूर्तता करून हा संच ऑक्टोबर २०२३मध्ये कार्यान्वित करण्यासाठी मेसर्स भेल चे युद्धस्तरीय प्रयत्न सुरूअसल्याचे डॉ.नलिन सिंघल यांनी सांगितले. केंद्र शासनाचा सार्वजनिक उपक्रम मेसर्स भेल aकंपनी करीत असून या कामांना अधिक जलद गतीने पूर्णत्वाकडे नेण्यासाठी महानिर्मितीचे अध्यक्ष तथा व्यवस्थापकीय संचालक डॉ.पी.अनबलगन यांनी नुकतीच दिल्ली येथे भेल कंपनीचे सी.एम.डी. डॉ.नलिन सिंघल यांची भेट घेतली.

मेसर्स भेल आणि महानिर्मिती अधिकाऱ्यांच्या संयुक्त बैठकीत भुसावळ वीज प्रकल्पाच्या विकास कामांचा तपशीलवार आढावा घेण्यात आला. तसेच भविष्यातील वीज प्रकल्प, विद्युत उत्पादन क्षेत्रातील नवनवीन अत्याधुनिक तंत्रज्ञान, बदलते निकष, पर्यावरणीय ऱ्हास आणि घडामोडी या विषयांवर या बैठकीत सविस्तर चर्चा झाली. यासंदर्भात मेसर्स भेल कंपनीने घेतलेल्या पुढाकाराबद्दल डॉ.पी.अनबलगन यांनी भेल कंपनीच्या अधिकाऱ्यांचे कौतुक केले. याप्रसंगी महानिर्मितीचे संचालक (प्रकल्प), अभय हरणे, मरावीम सूत्रधारी कंपनीचे निवासी कार्यकारी संचालक प्रफुल्ल पाठक तसेच भेलचे वरिष्ठ अधिकारी प्रामुख्याने उपस्थित होते.

राज्याच्या ग्रीडमध्ये ६६० मेगावॅटची भर पडणार

महाराष्ट्राच्या वीज क्षेत्राच्या दृष्टिकोनातून भुसावळ ६६० मेगावॅट हा अतिशय महत्त्वाकांक्षी प्रकल्प असून यावर्षी राज्याच्या ग्रीडमध्ये ६६० मेगावॅटची भर पडणार आहे. भुसावळ मधील ६६० मेगावॅट क्षमतेचा पहिला आणि कोराडीच्या ३ संचांनंतर हा महानिर्मितीचा चौथा संच आहे.