Sugercane News: साखरकारखान्याच्या वजन काट्याची अचानक झाली तपासणी अन्, वाचा पुढे काय झाले

टाकळी सिकंदर ता मोहोळ येथील भीमा सहकारी साखर कारखान्याच्या वजन काट्याची गुरुवारी अचानक तपासणी करण्यात आली, मात्र तपासणी करून तपासणी पथकाने वजन काटा योग्य व चोख असल्याचा निर्वाळा दिला.

साखर कारखाने उसाचा काटा मारतात व शेतकऱ्यांचे मोठे नुकसान होते अशा अनेक तक्रारी विविध शेतकरी संघटनांनी केल्या आहेत. साखर आयुक्त कार्यालयाने पथक नेमून वजन काटे तपासणीसाठी तीन सदस्यीय पथक नेमले आहे. ते पथक सध्या जिल्ह्यातील साखर कारखान्यांच्या वजन काट्याची तपासणी करीत आहे.

गुरुवारी अचानक कारखान्यावर पथक आले व त्यांनी एकच वाहन तीन ठिकाणच्या वजन काट्यावर फिरविले व तपासणी केली. तसेच 20 किलोची प्रमाणित वजनेही वजन काट्यावर ठेवून त्यांची ही पडताळणी केली, मात्र फरक आढळून आला नाही.

गेल्या 10 ते 15 वर्षापासून कारखान्याच्या वजन काट्या बाबत एकाही शेतकऱ्याची तक्रार आली नाही. तसेच बाहेर कुठल्याही वजनकाटयावर ऊस वजन करा व तो पुन्हा भिमाच्या काट्यावर वजन करा एक किलोचा जरी फरक पडला तरी एक लाख रुपयाचे बक्षीस कारखान्याचे मार्गदर्शक संचालक खासदार धनंजय महाडिक यांनी जाहीर केले आहे.

यावेळी कार्यकारी संचालक सूर्यकांत शिंदे म्हणाले, भिमाचा काटा चोख आहे म्हणुन शेतकऱ्यांचा भीमा वर मोठा विश्वास आहे. तो विश्वास वजन काटा तपासणीमुळे पुन्हा दृढ झाला आहे. भिमाने नेहमीच शेतकरी हिताला प्राधान्य दिले आहे.

यावेळी कारखान्याचे अध्यक्ष विश्वराज महाडिक, उपाध्यक्ष सतीश जगताप, पुरवठा निरीक्षक पी एच मगर, उपनियंत्रक ए डि गेटमे, शेतकरी प्रतिनिधी अश्रूभान येळे उपस्थित होते.