Farmer Suicide: कर्जबाजारीपणाला कंटाळून यवतमाळ आणि अमरावतीच्या दोन शेतकऱ्यांची आत्महत्या, मुख्यमंत्री करणार दौरा

Farmer Suicide: उमरखेड (जि. यवतमाळ) तालुक्यातील नारळी येथील संतोष माधव मखळे (वय ४०) यांनी स्वत:च्या शेतामधे आंब्याचा झाडाला गळफास लावून आत्महत्या केली. त्यांच्या मागे पत्नी, एक मुलगा, एक मुलगी असा परिवार आहे. त्यांच्यावर ढाणकी येथील राष्ट्रीयकृत बँकेचे कर्ज असल्याची माहिती आहे.

यवतमाळ जिल्ह्यात मागील नऊ महिन्यांमध्ये २०३ शेतकऱ्यांनी आत्महत्या केल्या असून हा सर्व केंद्र शासनाच्या कृषी धोरणांचा परिणाम आहे. या आत्महत्या नसून प्रत्यक्ष शासन व्यवस्थेकडून झालेल्या हत्या असल्याचा आरोप करून शेतमालाला हमीभाव व यवतमाळ जिल्ह्याला विशेष दर्जा देऊन या ठिकाणी दूरगामी परिणाम देणाऱ्‍या योजना राबवण्यात याव्या, अशी मागणी स्वाभिमानी शेतकरी संघटनेचे नेते मनीष जाधव यांनी केली आहे.

उद्या यवतमाळ जिल्ह्यामध्ये राज्याचे मुख्यमंत्री एकनाथराव शिंदे येत आहेत. शेतकऱ्‍यांना दिवाळीपूर्व अतिवृष्टीची आर्थिक मदत, प्रधानमंत्री पीक विमा योजनेचा लाभ आणि पन्नास हजार प्रोत्साहनपर रक्कम तसेच सोयाबीन पिकावर मर रोगामुळे बाधित शेतकऱ्‍यांना नुकसान भरपाईसाठी भरीव मदत करावी, या मागण्यांच्या पूर्ततेची अपेक्षा मुख्यमंत्र्यांकडून असल्याचे जाधव यांनी म्हटले आहे.

शेंडगावातही आत्महत्या

दर्यापूर तालुक्यातील (जि. अमरावती) कोकर्डानजीकच्या शेंडगाव येथील शेतकरी शरद विनायकराव येवले (वय ३८) यांनी कर्जाला कंटाळून शेतात गळफास घेऊन आत्महत्या केली. त्यांच्यामागे भाऊ, बहीण, आई असा परिवार असून ते घरातील एकटे कर्तापुरुष होते. त्यांच्याकडे दोन एकर शेती होती. मात्र मागील दोन-तीन वर्षांपासून नापिकी होत असल्याने कर्ज कसे फेडावे, या चिंतेत येवले सतत असायचे. या चिंतेतूनच त्यांनी आपली जीवनयात्रा संपविली, अशी चर्चा गावकऱ्यांमध्ये होती. शोकाकुल वातावरणामध्ये त्यांच्यावर शेंडगाव येथील स्मशानभूमीत अंत्यसंस्कार करण्यात आले. (Latest Marathi News)