सोलापूर रेल्वे स्थानकावर दोन दहशतवादी? शहर पोलिसांच्या कंट्रोल रुममधील फोन खणाणला; ७ मिनिटात पोलिसांची पथके स्थानकावर, प्रवाशांमध्ये धबराट अन्‌ पुढे...

सोलापूर : ‘सकाळचे अकरा वाजले होते, सोलापूर शहर पोलिसांच्या कंट्रोल रूममधील कॉल खणखणला. सोलापूर रेल्वे स्थानकात दोन दहशतवादी शिरले असून त्यांच्याकडे बॅगा आहेत, तातडीने मदत हवी आहे’ असा मेसेज पोलिसांना मिळाला. अवघ्या सात ते दहा मिनिटात सोलापूर शहर पोलिसांकडील बॉम्बशोधक पथक, शिघ्र प्रतिसाद पथक (क्युआरटी), केंद्रीय रेल्वे पोलिस, जीआरपी व सोलापूर शहर पोलिस त्याठिकाणी दाखल झाले. प्रवाशांना काहीच समजेना, सर्वजण घाबरले होते, अनेकांच्या अंगातून घामाच्या धारा गळत होता. पण, साधारणत: पाऊण तासांनी त्यांना समजले हा तर मॉक ड्रिल आहे आणि सर्वांनी सुटकेचा नि:श्वास सोडला.

दहशतवादी हल्ल्याच्या पार्श्वभूमीवर बुधवारी (ता. २१) सोलापूर रेल्वे स्थानकावर सोलापूर शहर पोलिसांतर्फे मॉक ड्रिल पार पडला. त्यावेळी बॉम्बशोधक पथक (बीबीडीएस), क्युआरटी, आरपीएफ, जीआरपी व सोलापूर शहर पोलिस सहभागी झाले होते. रेल्वे स्थानकावर दोन संशयित व्यक्ती फिरत असल्याचा कॉल आल्यानंतर सोलापूर शहर पोलिसांनी ५ ते १० मिनिटात सर्व सूत्रे हलवली आणि सर्वच पथके स्थानकावर दाखल झाली. त्यावेळी दोन संशयित व्यक्ती बॅग घेऊन फिरत होते. घटनास्थळी रुग्णवाहिका, अग्निशामक दलही दाखल झाले होते. सुरवातीला पोलिसांनी तो परिसर सील केला आणि लोक बाजूला काढले. बंदोबस्तात ‘क्युआरटी’ने ॲक्शन सुरू केली. काहीवेळाने त्यांनी त्या दोन संशयितांना ताब्यात घेतले व ‘बीबीडीएस’कडून त्यांच्याकडी बॅगांची तपासणी झाली. बॅगा तपासून त्यांना ‘एटीएस’च्या ताब्यात देण्यात आले. पाऊण तासाने ही मोहीम फत्ते झाली.

यावेळी ‘या’ अधिकाऱ्यांची उपस्थिती

यावेळी प्रभारी पोलिस आयुक्त अजित बोऱ्हाडे, पोलिस उपायुक्त विजय कबाडे, डॉ. दिपाली काळे, सहायक पोलिस आयुक्त राजन माने, यशवंत गवारी, प्रताप पोमण, विशेष शाखेच्या पोलिस निरीक्षक वैष्णवी पाटील, जेलरोड पोलिस ठाण्याचे वरिष्ठ पोलिस निरीक्षक शिवाजी राऊत, सदर बझार पोलिस ठाण्याचे वरिष्ठ पोलिस निरीक्षक अजित लकडे, ‘जीआरपी’चे सहायक पोलिस निरीक्षक मच्छिंद्रनाथ गुरव व त्यांचे १५ अंमलदार, केंद्रीय रेल्वे सुरक्षा बलाचेही अधिकारी उपस्थित होते.