Shivsena: आदित्य ठाकरेंचं शिवसेना फुटीवर मोठं वक्तव्य म्हणाले, “शिवसेना फुटीला उद्धव ठाकरे आणि मी…”

एकनाथ शिंदे आणि समर्थक आमदार यांनी शिवसेनेत केलेल्या बंडामुळे राज्यात मोठं सत्तानाट्य घडलं. एकनाथ शिंदेंसह ४० आमदारांनी भाजपसोबत सरकार स्थापन केलं. त्यामुळे शिवसेनेत फूट पडली. यानंतर शिवसेनेत फूट कोणामुळे पडली, अशा चर्चा राजकीय वर्तुळात रंगू लागल्या. काही जणांनी यासाठी भाजपाला, तर काहींनी राष्ट्रवादीला जबाबदार धरलं होतं. यावर शिवसेना (ठाकरे गटाचे) आमदार आदित्य ठाकरेंनी यावर सविस्तर भाष्य केलं आहे.

‘इंडिया टुडे’च्या एका कार्यक्रमावेळी बोलताना आदित्य ठाकरेंनी शिवसेनेतील बंडखोरीवरून मोठे गौप्यस्फोट केले आहेत. “शिवसेनेतील फुटीला उद्धव ठाकरे आणि मी जबाबदार आहे. उद्धव ठाकरेंनी आमदारांवर आंधळा विश्वास ठेवला. आम्ही त्यांना आमचे समजत होतो. गेल्या ४० ते ५० वर्षात मुख्यमंत्र्यांकडे राहिलेलं नगरविकास खातं देखील आम्ही त्यांना दिलं होतं,” असे सांगत आदित्य ठाकरेंनी एकनाथ शिंदेंवर हल्लाबोल केला आहे.

पुढे आदित्य ठाकरे म्हणाले की, “आम्ही त्यांच्यावर विश्वास ठेवला होता. आम्हाला वाटलं नव्हतं ते पाठीमागून वार करतील. सत्तेत असताना विरोधी पक्षातील नेत्यांना तडीपारीच्या नोटीसा दिल्या नाहीत. अथवा त्यांच्यावर पाळत ठेवली नाही. मात्र, आमच्या आमदारांवर पाळत ठेवली नाही, ही आमची चूक होती. राजकारण ही घाणेरडी जागा नाही,” असंही आदित्य ठाकरे पुढे म्हणालेत.

एकनाथ शिंदे मातोश्रीवर रडले! भाजपमध्ये गेलो नाहीतर जेलमध्ये टाकतील

“हे ४० लोकं त्यांच्या स्वत:च्या जागांसाठी आणि पैशांसाठी तिकडे गेले आहेत. सध्याचे मुख्यमंत्री त्यावेळी माझ्या घरी येऊन रडले होते. कारण त्यांना केंद्रीय यंत्रणा अटक करणार होत्या. त्यावेळी त्यांनी सांगितलं की मी भाजपसोबत गेलो नाही तर मला अटक होईल” आदित्य ठाकरेंच्या या वक्तव्यामुळे राजकीय वर्तुळात चर्चेला उधाण आले आहे.