Dasra Melava: दसरा मेळाव्याच्या आधीच झाली ठाकरेंच्या खास माणसाची चौकशी; वाचा काय आहे प्रकरण ?

Dasra Melava: उद्धव ठाकरे गटाचे आमदार आणि माजी मंत्री रवींद्र वायकर यांची मुंबई पोलिसांच्या आर्थिक गुन्हे शाखेने चौकशी केली. जोगेश्वरी पालिका भूखंड आणि पंचतारांकित हॉटेलचा समावेश असलेल्या ५०० कोटी रुपयांच्या घोटाळ्याप्रकरणी वायकर यांना समन्स बजावण्यात आले होते. त्यानुसार वायकर सकाळी ११ वाजता आर्थिक गुन्हे शाखेच्या कार्यालयात पोहोचले.

वायकर यांनी फसवणूक करून मुंबई महापालिकेकडून बागेसाठी राखीव असलेल्या भूखंडावर पंचतारांकित हॉटेलच्या बांधकामाची मंजुरी मिळवल्याचा आरोप आहे. या व्यवहारामुळे त्यांनी पालिकेचे नुकसान केल्याचाही आरोप आहे.

संबंधित प्रकरणात आर्थिक गुन्हे शाखेने यापूर्वीच पालिकेच्या उद्यान आणि इमारत प्रस्ताव विभागातील वरिष्ठ अधिकाऱ्यांची चौकशी केली आहे. पालिकेच्या इमारत प्रस्ताव विभागाने हॉटेलला बेकायदा मान्यता दिल्याचा आरोप आहे.

वायकर यांनी यापूर्वी सर्व आरोप खोटे आणि निराधार असल्याचे म्हटले होते. आपल्याकडे भूखंडाची सर्व कायदेशीर कागदपत्रे असून कोणत्याही नियमाचे किंवा कायद्याचे उल्लंघन झाले नसल्याचे त्यांनी सांगितले होते.

यंदाच्या वर्षी मार्चमध्ये किरीट सोमय्या यांनी कथित घोटाळ्याबद्दल आझाद मैदान पोलिस ठाण्यात तक्रार दाखल केली होती. त्यावर गुन्ह्याची नोंद करून पुढील चौकशीसाठी प्रकरण आर्थिक गुन्हे शाखेकडे हस्तांतरित करण्यात आले होते.