"एमएसएमई' लवकरच सुरू करणार ही योजना, नितीन गडकरींनी केली घोषणा

नागपूर : एमएसएमई ही केंद्राची संस्था लवकरच स्टॉक एक्‍सचेंज सुरू करणार असून देशातील आणि परदेशातील गुंतवणूकदारांना यात आपला पैसा गुंतवता येईल. तसेच सर्वसामान्य माणूसही एमएसएमईचे शेअर खरेदी करून गुंतवणूक करू शकेल, अशी माहिती केंद्रीय भूपृष्ठ वाहतूक, परिवहन व एमएसएमई मंत्री नितीन गडकरी यांनी दिली. 

"महाबीझ'च्या पदाधिकाऱ्यांशी ते व्हिडिओ कॉन्फरन्सच्या माध्यमातून संवाद साधत होते. गल्फ महाराष्ट्र बिझिनेस फोरमने हा संवाद कार्यक्रम आयोजित केला होता. विमा आणि शेअर्समध्ये गुंतवणुकीची संधी सध्या असल्याचे सांगताना गडकरी म्हणाले, उच्च प्रगती करणाऱ्या एमएसएमई उद्योगांना शासनाकडून रेटिंग मिळेल आणि शासनही 15 टक्के भागभांडवल उपलब्ध करून देईल. ऍमेझॉनसारखे "ई मार्केट प्लेस' ही एमएसएमई तयार करीत आहे. कोरोनामुळे त्याला वेळ लागणार आहे. पण, हे संकेतस्थळ सुरू झाल्यानंतर ऑनलाईन व्यवहार लोकांना करता येतील, असेही गडकरी म्हणाले. 
 

वाचा : शेतकऱ्यांसाठी आनंदाची बातमी, अखेर मॉन्सून विदर्भात दाखल
 

आत्मनिर्भर पॅकेजमध्ये 3 लाख कोटी बजेट एमएसएमईला मिळाले. याचा फायदा 45 लाख एमएसएमई उद्योगांना होणार आहे. फंड ऑफ फंडच्या माध्यमातून 50 हजार कोटींचे इक्विटी इनफ्यूजन, जे एमएसएमई उद्योग जलद गतीने प्रगती करीत आहेत. पायाभूत सुविधांमध्ये गुंतवणुकीसाठी हा योग्य काळ आहे. सध्या या क्षेत्राची स्थिती चांगली असून मागील 5 वर्षात आपण 17 लाख कोटींची कामे या क्षेत्राला दिली आहे. ऍग्रो एमएसएमईच्या संकल्पनेतून ग्रामीण भागात, जंगल क्षेत्रात आणि आदिवासी भागात उद्योग नेऊन या भागाचा विकास करण्याची संकल्पना यावेळी गडकरी यांनी मांडली.