विधानसभा अध्यक्ष राहुल नार्वेकर अचानक लंडन दौऱ्यावर; तर झिरवळ म्हणतात, मी आमदारांना अपात्र करेन!

मुंबईः राज्याच्या राजकारणात नेमकं काय सुरुय, हे नक्की कुणालाच सांगता येणार नाही. परंतु पडद्याआड काहीतरी नक्की सुरु आहे. आता अचानकपणे विधानसभेचे अध्यक्ष राहुल नार्वेकर लंडन दौऱ्यावर जात असल्याची माहिती पुढे येत आहे.

सत्तासंघर्षाचा निकाल कधीही येऊ शकतो. अशा परिस्थितीत ९ ते १५ मे दरम्यान नार्वेकर लंडन दौऱ्यावर जात आहेत. उद्या रात्री ते मुंबईतून निघणार आहेत. तर १५ तारखेला माघारी येत आहेत. एका कॉन्फरन्ससाठी ते जात असल्याचं सांगितलं जात आहे.

राज्यात मागील काही दिवसांपासून राजकीय घडामोडींना वेग आलेला आहे. अजित पवार भाजपसोबत जाणार, असं बोललं जात असतांनाच शरद पवारांनी निवृत्ती जाहीर केली आणि माघारीही घेतली. त्यानंतर शिवसेना आणि राष्ट्रवादीतही तू-तू, मैं-मैं सुरु झालेलं आहे.

महत्त्वाचं म्हणजे सत्तासंघर्षाचा निकाल येत्या दोन-तीन दिवसांमध्ये येऊ शकतो, अशी परिस्थिती निर्माण झाली आहे. असं असतांना राहुल नार्वेकर लंडन दौऱ्यावर जात असल्याने आश्चर्य व्यक्त होत आहे. 'एबीपी माझा'ने यासंदर्भातील वृत्त दिले आहे.

आमदारांचं प्रकरण माझ्याकडे आल्यास मी त्यांना अपात्र करेन- नरहरी झिरवळ

नरहरी झिरवळ यांच्या या वक्तव्यामुळे राजकीय नेत्यासह सर्वांच्याच भुवया उंचावल्या असून आता सर्व लक्ष सर्वोच्च न्यायालयाच्या निकालाकडे लागलं आहे. नरहरी झिरवळ यांनी प्रसारमाध्यमांशी बोलतांना आमादारांना अपात्र करण्यचा मुद्दा उपस्थित केला आहे.