आतातरी जागे व्हा! ‘डिजिटल ॲरेस्ट’ पोलिस करतच नाहीत; सायबर गुन्हेगाराकडून माय-लेकींना २१.५० लाखांचा गंडा; महाविद्यालयात ऐकले नाही ‘सायबर’चे लेक्चर, अन्यथा...

तात्या लांडगे

सोलापूर : ‘मै मुंबई क्राईम ब्रॅंच से बोल रहा हू, आपके आधारकार्ड का मिस यूज हुआ है, नरेश गोयल नाम के फ्रॉड व्यक्तीने आपके आधारकार्डद्वारा गलत काम किया है. आपको डिजिटल ॲरेस्ट किया है, सुप्रिम कोर्टने आपके नाम वॉरंट इश्यू किया है. आप किसी को कोई मत बताओ’ असे म्हणून सोलापूर शहरातील माय-लेकीस सायबर गुन्हेगारांनी सात दिवस घरातून बाहेर पडू दिले नाही. ६ ऑगस्ट रोजी बॅंकेतील ठेव मोडून २१ लाख ५० हजार रुपये सायबर गुन्हेगाराच्या खात्यात वर्ग केल्यावर त्यांना सोडले. त्या महिलेने आता सायबर पोलिसांत धाव घेतली आहे.

जोडभावी पेठ पोलिस ठाण्याच्या हद्दीतील महिला आपल्या दोन मुलींसोबत राहाते. वडिलोपार्जित संपत्तीतून त्या महिलेस काही लाख रुपये मिळाले होते. आपल्याला दोन्ही मुलीच असल्याने त्या महिलेने ती रक्कम एका बॅंकेत ‘एफडी’ करून ठेवली होती. सायबर गुन्हेगाराच्या भीतीने ती संपूर्ण रक्कम महिलेने गुन्हेगारांच्या खात्यात वर्ग केली. दोन लाख रुपये फोन पेवरून आणि १९ लाख ५० हजार रुपये ‘एनईएफटी’ करून पाठविले.

सायबर गुन्हेगारांनी सांगितल्याप्रमाणे सगळी रक्कम पाठविल्यानंतर त्या माय-लेकी जोडभावी पेठ पोलिसांत गेल्या. त्यावेळी डिजिटल ॲरेस्ट, असे काहीच नसते, असे पोलिसांनी सांगितले. त्यावेळी त्यांना फसवणूक झाल्याची खात्री झाली. दरम्यान, दोन लाख रुपये ट्रान्स्फर झालेल्या पश्चिम बंगालमधील खात्यात सध्या अवघे चार हजार रुपयेच असल्याचे तपासात समोर आले आहे. सोमवारी (ता. ११) या प्रकरणी सायबर पोलिसांत गुन्हा दाखल करून पुढील तपास केला जाईल, असे अधिकाऱ्यांनी सांगितले.

महिलेस शंका आली होती, पण...

मुंबईतील कुलाबा पोलिस ठाण्यातील क्राईम ब्रॅंचमधून बोलणारा समोरील व्यक्ती हिंदीतून बोलत होता. त्यावेळी फसलेली महिला त्या व्यक्तीला म्हणाली, ‘तुम्ही मुंबईतून बोलताय, मग मराठीतून का बोलत नाहीत, हिंदीतून कसे काय बोलताय.’ तेव्हा आम्ही दिल्लीतून बोलतोय, सीबीआयकडे देखील आपले प्रकरण आले आहे, असे सांगून त्याने भीती दाखविली.

...तर फसवणूक झालीच नसती

फसवणूक झालेल्या महिलेची मुलगी सोलापूर शहरातील एका नामांकित शाळेत बारावीपर्यंत शिकली आहे. फसवणूक झाल्याची फिर्याद द्यायला आल्यावर, त्या मुलीला सायबर पोलिस म्हणाले, आम्ही तुझ्या कॉलेजमध्ये सायबर गुन्हेगारी, फसवणूक यावर अनेकदा जनजागृतीचे लेक्चर घेतले आहेत. तरीपण, तुम्ही कसे काय फसलात. त्यावेळी आपण त्या लेक्चरला उपस्थित नसल्याचे मुलीने सांगितले. कदाचित, ती मुलगी सायबर पोलिसांच्या लेक्चरला उपस्थित राहिली असती तर ही फसवणूक झाली नसती, असे वरिष्ठ पोलिस निरीक्षक श्रीशैल गजा यांनी सांगितले.