आषाढी वारी काळातील पूरस्थिती टाळण्यासाठी उजनी धरणातून सोडले पाणी! धरणातून सोडलेला २५,००० क्युसेकचा विसर्ग आज पंढरपुरात; चंद्रभागा नदीचे पात्र भरणार काठोकाठ

सोलापूर : उजनी धरणातून शनिवारी (ता. २१) सोडलेला २० हजार क्युसेकचा वाढीव विसर्ग व नीरा नदीतून येणारा पाच हजारांचा विसर्ग उद्या (सोमवारी) सकाळी दहा-साडेदहा वाजेपर्यंत पंढरपुरात येईल. त्यामुळे चंद्रभागा नदीपात्रातील विसर्ग तेव्हा २५ हजार क्युसेक होऊन नदीपात्र काठोकाठ भरलेले असेल, अशी माहिती उजनी धरण व्यवस्थापनच्या कार्यकारी अभियंत्यांनी दिली. त्यांनी नागरिकांना सतर्क राहण्याचेही आवाहन केले आहे.

सोलापूर व पुणे जिल्ह्यातील पावसामुळे उजनी धरण पहिल्यांदाच २२ जूनपर्यंत ७७ टक्के भरले असून सध्या उजनीतून २६ हजार ६०० क्युसेकचा विसर्ग भीमा नदीतून सोडून देण्यात आला आहे. दौंडवरून धरणात १५ हजार क्युसेकची आवक आहे. पाणी आताच अडवून ठेवले तर धरण आठ दिवसांत १०० टक्के भरेल आणि आषाढी वारीच्या काळात मुसळधार पाऊस झाल्यास धरणातून मोठा विसर्ग नदीतून सोडावा लागू शकतो. त्यामुळे नदीकाठी पूरस्थिती निर्माण होऊन जनजीवन विस्कळित होण्याची शक्यता आहे. त्यामुळे आतापासूनच त्याची खबरदारी घेत धरणातील पाणीसाठा ७० टक्क्यांपेक्षा जास्त होणार नाही, याकडे विशेष लक्ष दिले जात आहे.

या पार्श्वभूमीवर पुढील तीन दिवसांत धरणातून २५ ते ३० हजार क्युसेकने पाणी नदीत सोडून पुढे वारीपूर्वी तो विसर्ग दहा हजारांपर्यंत ठेवला जाणार आहे. २८ जूनपासून मुसळधार पावसाचा अंदाज असल्याने धरणातून एकाचवेळी नदीतून मोठा विसर्ग सोडावा लागणार नाही, याचीही दक्षता घेतली जात आहे. उजनीत सध्या १०५ टीएमसी पाणी असून त्यात ४१ टीएमसी उपयुक्त पाणीसाठा आहे.

आषाढीपूर्वी सोडले जाणार ८ टक्के पाणी

६ जुलै रोजी पंढरपुरात आषाढी वारीचा सोहळा रंगणार आहे. त्यावेळी पंढरपुरात राज्यभरातील १३ ते १५ लाख भाविक दर्शनासाठी येतील, असा पोलिस प्रशासनाचा अंदाज आहे. त्यामुळे चंद्रभागा नदीपात्रात (वाळवंट) वारी काळात पाण्याचा विसर्ग जास्त राहणार नाही, याची दक्षता लाभक्षेत्र विकास प्राधिकरणाकडून घेतली जात आहे. त्यासाठी सध्या धरणातून २६ हजार ६०० क्युसेकचा विसर्ग भीमा नदीतून सोडून देण्यात आला आहे. वारीपूर्वी ७८ टक्के भरलेल्या धरणातील पाणीसाठा ७० टक्क्यांवर आणला जाणार आहे. वारीच्या काळात चंद्रभागेच्या वाळवंटातही भाविक थांबू शकतील, त्यांना धोका होऊ नये हा त्यामागील हेतू आहे.