Winter Session 2023 : विठ्ठलाच्या प्रसादाचा लाडू निकृष्ट दर्जाचा; हिवाळी अधिवेशनात अहवाल सादर

मुंबईः पंढरपूरच्या विठ्ठलाचा लाडूचा प्रसाद वारकरी मोठ्या मनोभावे घरी घेऊन जातात, परंतु हा लाडू आरोग्याला अपाय करु शकतो, असा अहवाल आहे. तो अहवाल विधीमंडळ अधिवेशनामध्ये सादर झालेला आहे. २०२०-२०२१ वर्षातील हा प्रकार असला तरी दोषींवर कारवाई झालेली नाही.

२०२०-२१मध्ये ज्या संस्थेला प्रसादाचा लाडू बनवण्याचं कंत्राट दिलं होतं. त्या संस्थेला लाडू बनवण्यासंदर्भात निकष लावण्यात आले होते. लाडूमध्ये कुठले ड्रायफ्रूट किती प्रमणात हवेत, कुठल्या तेलामध्ये लाडू बनवले गेले पाहिजेत याची नियमावली होती. परंतु प्रत्यक्ष तपासणी अहवालामध्ये तफावत आढळून आली.

तेव्हाच्या लेखापरीक्षण अहवालामध्ये जिथे लाडू बनवले जात होते, तिथे अस्वच्छता, खराब दर्जाचं तेल आणि लाडूंमध्ये ड्रायफ्रूटचा पत्ता नव्हता. त्यामुळे लेखापरीक्षण अहवालाच्या आधारावर ते टेंडर रद्द करण्यात आलेलं होतं. परंतु संबंधित संस्थेवर कारवाई करण्यासाठी विधीमंडळ अधिवेशनात अहवाल सादर करण्यात आलेला आहे. 'एबीपी माझा'ने हे वृत्त दिले आहे.