APMC Election : येवला कृषी उत्पन्न बाजार समितीवर छगन भुजबळांचे वर्चस्व

येवला : राज्यातील 147 कृषी उत्पन्न बाजार समित्यांसाठी शुक्रवारी मतदान पार पडलं. यापैकी 37 बाजार समित्यांची मतमोजणी शुक्रवारीच पार पडली होती. तर काही बाजार समित्यांचे निकाल आज जाहीर होत आहेत.  त्यापैकी नाशिक जिल्ह्यातील येवला येथील कृषी उत्पन्न बाजार समितीवर माजी उपमुख्यमंत्री छगन भुजबळ यांच्या गटाने वर्चस्व राखले आहे.

येवला कृषी उत्पन्न बाजार समितीच्या १८ पैकी १३ जागा मिळवीत माजी उपमुख्यमंत्री छगन भुजबळ यांच्या गटाचे उमेदवार विजयी झाले आहेत. उर्वरीत पाच जागांमध्ये अपक्ष दोन आणि शिंदे गटाला तीन जागांवर विजय मिळवता आला आहे. आमदार दराडे आणि शिंदे गटाले केवळ तीन जागांवर समाधान मानावं लागलं आहे.

दरम्यान, छगन भुजबळ यांच्या शेतकरी विकास पॅनेलने बाजी मारली आहे. त्याचबरोबर राष्ट्रवादीने बारामतीमध्ये आपला एकहाती विजय मिळवला आहे. बारामती कृषी उत्पन्न बाजार समितीमध्ये १८ पैकी १८ जागांवर दणदणीत विजय मिळवला आहे.