Prasad Khandekar: 'एकदा येऊन तर बघा' पण थिएटरच नाही.. खांडेकरांच्या सिनेमाची चर्चा अधिवेशनात, फडणविसांनी दिलं आश्वासन

Ekda Yeun Tar Bagha News: सध्या नागपूरमध्ये हिवाळी अधिवेशन सुरु आहे. यामध्ये विविध विषयांवर चर्चा होतेय. अशातच हिवाळी अधिवेशनात मराठी सिनेमांविषयीचा एक गंभीर मुद्दा उपस्थित करण्यात आलाय.

प्रसाद खांडेकर लिखित - दिग्दर्शित 'एकदा येऊन तर बघा' सिनेमा उद्या संपूर्ण महाराष्ट्रात रिलीज होतोय. अशातच सिनेमाला थिएटर मिळत नसल्याने प्रसादने नाराजी व्यक्त केलीय.

प्रवीण दरेकर यांनी उपस्थित केला गंभीर मुद्दा

आमदार प्रवीण दरेकर यांनी नागपूरच्या हिवाळी अधिवेशनात हा मुद्दा उपस्थित केला. दरेकर म्हणाले, "बोरीवलीमध्ये प्रसाद खांडेकर नावाचे कलाकार आहेत. महाराष्ट्राची हास्यजत्रामुळे ते लोकप्रिय आहेत. त्यांचा आगामी सिनेमा एकदा येऊन तर बघा रिलीज होण्याच्या मार्गावर आहे. पण इंडस्ट्रीतले काही बॉस - दादा लोकं आहेत, जे सिनेमाला थिएटर मिळू जेत नाहीत. प्रसाद हा मराठी तरुण सामान्य मध्यमवर्गीय कुटुंबातला आहे. त्यामुळे मुख्यमंत्री - उपमुख्यमंत्र्यांनी या प्रकरणात लक्ष घालावं.

फडणवीसांचं आश्वासन

दरेकरांनी मुद्दा उपस्थित केल्यावर उपमुख्यमंत्री देवेंद्र फडणवीस म्हणाले, "प्रसाद खांडेकर हा अतिशय गुणी कलावंत आहे. हास्यजत्रेच्या माध्यमातुन सातत्याने तो लोकांचं मनोरंजन करत आहे. जर त्याच्या मराठी सिनेमाला थिएटर मिळत नसेल तर आवश्यकतेनुसार कायगेशीर कारवाई केली जाईल, असं फडणवीसांनी आश्वासन दिलं.

एकदा येऊन तर बघा सिनेमाबद्दल

एकदा येऊन तर बघा सिनेमात दिग्गज कलाकारांची फौज आहे. सयाजी शिंदे, गिरीश कुलकर्णी, नम्रता संभेराव, विशाखा सुभेदार, ओंकार भोजने, भाऊ कदम, वनिता खरात, रोहित माने असे कलाकार आहेत.

या सिनेमाचं लेखन - दिग्दर्शन प्रसादने केलं असुन स्वतः प्रसाद खांडेकर सुद्धा सिनेमात भुमिका साकारणार आहे. हा सिनेमा उद्या ८ डिसेंबरला संपूर्ण महाराष्ट्रात प्रदर्शित होतोय.