शनायाने भाऊबीज साजरी केली चक्क सौमित्रसोबत!

दिवाळीमधले सगळेच दिवस तसे खास असतात, पण सर्व भाऊ-बहिणींसाठी लाडका दिवस म्हणजे भाऊबीज. या दिवशी सोशल मीडियावर असंख्य भावा-बहिणींचे फोटो मस्त मस्त कॅप्शन्स देऊन शेअर झालेले असतात. या सगळ्यात कलाकारही कुठे कमी पडत नाहीत बरं का... कामाचा कितीही ताण आणि व्यग्र वेळांमधूनही खास वेळ काढत आपल्या सेटवरच सण साजरे करतात.

अशाच प्रकारे एका बहिण-भावाच्या जोडीने सेटवरच भाऊबीज साजरी केली आहे. हा सेट होता 'माझ्या नवऱ्याची बायको' या मालिकेचा... आणि भाऊ-बहिण कोण होते ओळखा? भाऊ होता राधिका सुभेदारचा होणारा नवरा सौमित्र आणि बहिण होती चक्क गुरूनाथ सुभेदारची गर्लफ्रेंड शनाया! अर्थात ही ऑफस्क्रीन भाऊबीज असल्यामुळे 'माझ्या नवऱ्याची बायको'चा दिग्दर्शक अद्वैत दादरकर आणि ईशा केसकर या दोघांनी सेटवर भाऊबीज साजरी केलीय. सोशल मीडियावर हा व्हिडिओ व्हायरल होतोय.

सध्या झी मराठी वाहिनीवरील ‘माझ्या नवऱ्याची बायको’ ही मालिका चर्चेत आहे. टीआरपीच्या यादीमध्ये नेहमी पहिल्या किंवा दुसऱ्या क्रमांकावर असते. या मालिकेतील शनाया, गुरुनाथ सुभेदार आणि राधिका सुभेदार या तीन पात्रांची केमेस्ट्री पाहण्यासारखी आहे.