Deepika Padukone: 'हेयरस्टायलिस्ट घाईत होती वाटतं?' दीपिका ऑस्कर 2023 पार्टीतील लूकमुळे झाली ट्रोल

दीपिका पादुकोणने फक्त बॉलिवूडमध्येच नाही तर, हॉलिवूडमध्ये देखील स्वतःचे स्थान पक्के केले आहे. हॉलिवूडच्या चित्रपटांमध्ये झळकल्यानंतर दीपिकाने यावर्षी ऑस्कर पुरस्कार सोहळ्यात प्रेजेंटर म्हणून प्रवेश केला.

यावर्षीचा पुरस्कार सोहळा भारतासाठी खूपच खास ठरला. कारण एक नव्हे तर दोन ऑस्कर पुरस्कार भारताने पटकावले आहेत. भारतीयांसाठी हा क्षण अत्यंत अभिमानाचा होता. ‘सर्वोत्कृष्ट डॉक्युमेंट्री शॉर्ट’ विभागात ‘द एलिफंट व्हिस्परर्स’ या लघुपटाने पुरस्कार पटकावला.

तर आरआरआर चित्रपटातील ‘नाटू नाटू’ या गाण्याने सर्वोत्कृष्ट मूळ गाण्याच्या विभागात बाजी मारली. ऑस्करच्या मंचावर नाटू नाटू या गाण्यावर डान्स परफॉर्मन्सही पार पडला.

अभिनेत्री दीपिका पदुकोणने परफॉर्मन्सची घोषणा स्टेजवर येऊन केली. पण जेव्हा संगीतकार एम. एम. किरवाणी आणि गीतकार चंद्रबोस हे ट्रॉफी स्वीकारण्यासाठी स्टेजवर गेले तेव्हा दीपिका पादुकोण भावुक झाली.

दीपिका पदुकोणची पुरस्कार सोहळ्या दरम्यान लूकची देखील तुफान चर्चा रंगली. दीपिकाने ऑस्करच्या पार्टीसाठी पर्पल रंगाचा ग्लॅमरस फेदर ड्रेस घातला. दीपिकाने तिचे काही फोटो इन्स्टाग्रामवर शेअर केले.

काही चाहत्यांना अभिनेत्रीचा लूक आवडला तर, काहींनी तिला ट्रोल केलं. एक युजर दीपिकाचे केस पाहून म्हणाला 'हेयरस्टायलिस्ट जरा घाईत होती वाटतं?', तर दुसरा युजर म्हणाला, 'भारतासाठी आज अभिमानाचा क्षण होता'.